চাকমা কবিতা ফিরিবের মনে কহ্'র ম্যাকলিন চাকমা !! Chakma Poetry

 

ফিরিবের মনে কহ্'র

ম্যাকলিন চাকমা

এচ্যা ভালোক দিন পরে

মন গম পানার এক্কান সবন দেখ্যঙ

বেল দুবোন্দিত বেগে ঘরত ফিরোদন

নানান পেঘোর কিদিরিহ্ঙে তারুম আন উম ওহ্ই উধের

এক ঝলগা মিধে বয়ের কেয়েত বাঝি কিরবে ছিদের।

এচ্যা ঘুমোত্তুন জাগানার পরে 

সবনানি কিরবে মনত উরি উরি বেরার

বার্গি পেঘো সান ঝাগে ঝাক দুও মেলি

চিগোন গুরো সান কল'গত খারা খেলি খেলি

পুরোন মিধে দিনুন মনত উধি মন কানের।

ভালক দিন জেরে এচ্যা সিঙোর ত ফিরিবের মনে কহ্'র

সেক্কে কাপ্যা জুমান জদেবদে চেবার ধারাচ অহ্'র।

মর চিত কানোনি জুরভো পেঘোর, কালা কালা কোগিলর কিদিরিঙত।

এচ্যা ভালক দিন জেরে

আবাদা সবন দেঘি অহ্'রিঙে মোনর কধা ইহ্ধোত উধি যাই

কধক গীত কবিতে ওহ্য়ে মর অহ্'রিঙে মোন'রে নিনেয়।

মুইও গান লিখ্যঙ, কবিতে রজেয়োঙ চিগন কালত

বাবাহ্ সমারে রেদো সম্ভাগত জুম রাঘাদে রাঘাদে।

কুহ্'রি কুহ্'রি নুও ধানর পাদানি নাজি নাজি উত্থ্যা

এক সান্যা মাত্তলত।

মুই গেচ্চেক ফিরিবের চাঙ

মর এককালে উধোন বঝন্দির সিঙোর'ত

নুও রেঙ দিনেই

মুই গীদে রেঙে জাগেয় তুলিবের চাঙ

মর মুরোহ্'র মরি যেয়্যা সবনানিরে।