চাকমা কবিতা/লাড়েইর সমার - লেঘিয়ে রিজেং চাকমা !!

 লাড়েইর সমার

রিজেং চাঙমা 

অবাং পাদারে নিবিলি বনে

কদক আদি বেড়েলে

মশা পুগির কামড় খেই

দুঘরে দুঘ ন'হলে।

রেদ ন লাগে দিন ন লাগে

আদাম পাড়ি আদাম 

কদক মোন মুরো পাড়ি

লাড়েইত সমার অদে।

মাত্তর এচ্চে তুই নেই

তর্ মর্ ফারগ অহ্'না

রেজারিজ্জে জীংকানি কাদানা

কদক সমার আরেলং উদিজ্ নেই।

এক বিচ্চনত্ এক কলা পাদাত

খেয়েই কদক ভাত যেয়েই ঘুম

অধিকার পেবার আজাই 

ঘুমরে ঘুম নকোই রেদরে রেত্ নকোই।

এজ চোঘত বাজে সে দিনুন

রাজ পদত সিংহ দক গুজিরোদোং

সমারর সং গুজোরানিত

রাজ পদত বুজোল ভেই যে'দ।

আহ্ মনত দুঘ লাগে এচ্চে 

সমারুন তুমি নেই যা দগে তে যেওগোই

তোমা ভালেদি তুমি পেওয়ো

টেঙা বজরর চোল চাগরি।

মাত্তর আমি আমা পো সাবাই

তোমা পো সাবাই এচ্ছে কন্ পদে

নেই স্বাধীনতা নেই নিরাপত্তা 

ভেইয়ে ভেইয়ে এগজা খোলকজ্জ্যা।