তুই কন্না?
রিজেং চাকমা
তুই কন্না?
মরে আকসোবার
তুই কন্না কোন উত্তোমুত্তো লয়
মরে বাঙাল বানেবার চাচ।
মুই চাঙমা জাত, মর ভাচ্ আগে
আগন অহরক আহ্ রিদিসুদোম
পোজাগে আজাগে মর চিন্
গীদোর সুরেও মর চিন্
মুই গাই নয়, ম'লগে আর আগন সমার
মগ, তিবিরে, বম আরও নানাক্কান।
মোন মুরোর নাঙেলে নাঙেলে
জুম সাবর তারেঙে তারেঙে
ছড়ার থুমে থুমে মিঝি আগে
আমা জাদর রিদিসুদোম।
তুই কন্না?
মরে আকসোবার
কোন কালে কোন মুনিজসোরে
মরে মর কামত ন আকসোন
না ব্রিটিশ না পাকিস্তান
তুই কন্না?
কিত্তেই এদক তোচ্ছ্যা কাবর মরে।
মর কামত মরে ন আকসোস্
ম উত্তোমুত্তো মরে দে
নহলে আঘাজ গুজুরিবো
চিলে খেবাক তর্ কিরবে চোখ।
কালা ধুমোই ঢাগি যে'ব
আন্ধার লামিবো পিত্তিমীত
রাঙা অ'ব ছড়া নাল
উত্তোমুত্তোর লাড়েইয়ে।
নুও উদোন্দি মান্যেয়র্ সবন
জধার বলে মুজুঙে উজানা
সে উজানাত যে আকসোব
তার কবালত আঘাজ ভাঙিবো।
তুও কি তুই আকসোবে?
মর পরান মর রিবেং
এ জাগার কনায় কনায়
যেদক যলেবে সেদক জলিম
বম্বাত ফুন দিলে যেন আগুন বনবনাই।
ফুদো আঙারা দক্ ছিদি পরিবোং
আমা জাত আমা ভাচ্ আমা রিদিসুদোম
আমি পরান দিনেই বাজে রাগেবং।
তুই কন্না?
কুত্তুন এলে ম জাগাত
আরও মরে উগুম গিরি গরচ্
ম জাগাত খেই ম জাগাত তেই
ম জাদর বিরোধে কধা তুলোচ।
মনত রাঘেচ বল্ সারাজিংকানি নথায়
ঘাম জরে বল পরে রিবেঙত ধরে
এ মোন মুরো একদিন ইজেব ল'ব তোমারে।
No comments:
Jhu Jhu
Welcome to my blog. I don't know how much my blog will help you. Can not help as you like? Let me know your choice in the comments to get your choice. I will try to give your favorite poems and books. Thank you for coming to my blog, come back .