চাকমা পজ্জন “চই সোনা আ র-মানিক্য" পজ্জন // জ্যোতি প্রভা লারমা

 

𑄌𑄧𑄄-𑄥𑄮𑄚 𑄃 𑄢𑄧-𑄟𑄚𑄨𑄇𑄳𑄡𑄬 𑄛𑄧𑄎𑄴𑄎𑄧𑄚𑄴

               𑄎𑄳𑄡𑄮𑄖𑄨𑄛𑄳𑄢𑄧𑄞 𑄣𑄢𑄴𑄟

𑄘𑄨𑄎𑄧𑄚𑄴 𑄛𑄨𑄘𑄧𑄣𑄩 𑄟𑄨𑄣 𑄉𑄙𑄨𑄝𑄖𑄴𑄖𑄠𑄴 𑄃 𑄡𑄨𑄠𑄧𑄚𑄴𑅁 𑄘𑄨-𑄝 𑄟𑄨𑄣 𑄉𑄋𑄧𑄖𑄴 𑄣𑄉𑄧𑄖𑄴 𑄛-𑄛𑄨 𑄃𑄧𑄄𑄚𑄳𑄡𑄄 𑄖𑄢𑄬 𑄘𑄨𑄊𑄨𑄚𑄬𑄭 𑄖𑄬 𑄦

𑄎𑄬, 𑄖𑄢𑄬 𑄘𑄨𑄊𑄨𑄚𑄬𑄭 𑄖𑄬 𑄦𑄎𑄬𑅁 𑄇𑄠𑄴𑄇𑄪𑄭 𑄃𑄧𑄄𑄚𑄳𑄡𑄄 𑄃𑄢𑄧 𑄝𑄬𑄥𑄴 𑄦𑄎-𑄦𑄎𑄨 𑄉𑄧𑄢𑄨𑄣𑄇𑄴𑅁 𑄄𑄇𑄴𑄇𑄧𑄠𑄴 𑄇𑄧𑄖𑄴𑄬, “𑄟𑄧𑄢𑄬 𑄘𑄬𑄊𑄨𑄚𑄬𑄭 𑄖𑄪𑄭 𑄇𑄨𑄖𑄴𑄖𑄠𑄴 𑄦𑄎𑄧𑄢𑄴𑅃” 𑄃𑄢𑄮𑄇𑄴𑄇𑄪𑄠 𑄇𑄧𑄖𑄴𑄬, “𑄖𑄪𑄭 𑄇𑄨𑄖𑄴𑄖𑄠𑄴 𑄦𑄎𑄧𑄢𑄴𑅃” 𑄟𑄖𑄴𑄧𑄢𑄴 𑄇𑄧𑄙 𑄃𑄧𑄣𑄧𑄘𑄬 𑄘𑄪𑄚𑄧 𑄎𑄧𑄚𑄬 𑄆𑄇𑄴𑄪𑄄𑅁

𑄖𑄬 𑄛𑄧𑄣𑄴𑄬-𑄇𑄧𑄣𑄧𑄘𑄬 𑄟𑄨𑄣𑄝𑄪𑄠 𑄃𑄢𑄮𑄇𑄴𑄇𑄪𑄠𑄢𑄬 𑄇𑄧𑄖𑄴𑄬, “𑄖𑄧𑄣𑄴𑄮𑄄 𑄆𑄇𑄴𑄇𑄚𑄴 𑄥𑄧𑄖𑄳𑄡 𑄉𑄮𑄢𑄨𑄚𑅁” 𑄖𑄬 𑄃𑄢𑄮𑄇𑄴𑄇𑄪𑄠 𑄇𑄧𑄖𑄴𑄬, “𑄘𑄬 𑄉𑄮𑄢𑄨𑄚𑅁” 𑄇𑄎𑄬𑄭 𑄘𑄪𑄚𑄧 𑄎𑄧𑄚𑄬 𑄆𑄇𑄴 𑄟𑄧𑄘𑄧𑄖𑄴 𑄡𑄨𑄠𑄳𑄡𑄚𑄴𑅁 𑄖𑄬 𑄇𑄮𑄇𑄨 𑄉𑄮𑄣𑄴𑄣𑄇𑄴𑄬, 𑄆𑄇𑄴𑄎𑄚𑄬 𑄇𑄧𑄖𑄴𑄬, “𑄟𑄧𑄢𑄴 𑄡𑄧𑄘𑄨 𑄟𑄨𑄣 𑄛𑄪𑄠 𑄦𑄧𑄠𑄴, 𑄃𑄢𑄴 𑄖𑄧𑄢𑄴 𑄃𑄮𑄠 𑄡𑄧𑄘𑄨 𑄟𑄨𑄣 𑄛𑄪𑄠 𑄦𑄧𑄠𑄴, 𑄥𑄣𑄬𑄚𑄴 𑄝𑄮𑄚𑄴 𑄎𑄪𑄢𑄎𑄪𑄢𑄨 𑄉𑄮𑄢𑄬𑄭 𑄘𑄨𑄝𑄧𑄁𑅁” 𑄃-𑄢𑄧 𑄄𑄇𑄴𑄪𑄠 𑄇𑄧𑄖𑄴𑄬, “𑄟𑄧𑄢𑄴 𑄟𑄧𑄢𑄧𑄖𑄴 𑄛𑄪𑄠 𑄦𑄧𑄣𑄬, 𑄖𑄧𑄢𑄴 𑄟𑄨𑄣 𑄛𑄪𑄠 𑄦𑄧𑄣𑄬 𑄥𑄣𑄬𑄚𑄴 𑄚𑄬𑄇𑄴-𑄟𑄮𑄇𑄴 𑄎𑄪𑄢𑄎𑄪𑄢𑄨 𑄉𑄮𑄢𑄨 𑄘𑄨𑄝𑄳𑄡𑄁𑅁 𑄟𑄚𑄬 𑄝𑄬𑄚𑄨-𑄝𑄬𑄚𑄨 𑄃𑄧𑄝𑄧𑄁𑅁” 𑄥𑄨𑄠𑄚𑄴 𑄘𑄨-𑄎𑄧𑄚𑄬 𑄈𑄪𑄎𑄨𑄠𑄬-𑄦𑄎𑄨𑄠𑄬 𑄢𑄎𑄨 𑄃𑄧𑄣𑄇𑄴𑅁

𑄛𑄨𑄘𑄪𑄣𑄩 𑄟𑄨𑄣𑄉𑄪𑄚𑄬 𑄘𑄪𑄚𑄧 𑄎𑄧𑄚𑄬 𑄛𑄪-𑄠 𑄛𑄪𑄘𑄬𑄣𑄇𑄴𑅁 𑄆𑄇𑄴𑄎𑄧𑄚𑄧𑄖𑄴𑄪𑄚𑄴 𑄟𑄧𑄢𑄧𑄖𑄴 𑄛𑄪𑄠 𑄃 𑄃𑄢𑄬𑄇𑄴𑄎𑄧𑄚𑄧𑄖𑄴𑄪𑄚𑄴 𑄟𑄨𑄣 𑄛𑄪-𑄠𑄧 𑄃𑄧𑄣𑄧𑅁 𑄡𑄨𑄝𑄢𑄴 𑄟𑄧𑄢𑄧𑄖𑄴 𑄛𑄪𑄠 𑄃𑄧𑄄𑄠𑄳𑄡𑄬 𑄥𑄬 𑄟𑄧𑄢𑄧𑄖𑄴 𑄛𑄪𑄠𑄝𑄪𑄠𑄢𑄬 𑄚𑄋𑄴 𑄢𑄊𑄬 𑄘𑄨𑄣𑄇𑄴𑄬 ‘𑄢𑄧-𑄟𑄚𑄬𑄇𑄴𑄇𑄳𑄡𑄧𑄧𑅁’ 𑄃 𑄟𑄨𑄣 𑄜𑄪𑄘𑄬𑄭𑄠𑄬𑄘𑄬 𑄄𑄝𑄢𑄬 𑄚𑄋𑄴 𑄝𑄧𑄎𑄬 𑄘𑄨𑄣𑄇𑄴 ‘𑄌𑄧𑄄 𑄥𑄮𑄚’𑅁 ‘𑄌𑄧𑄧𑄄 𑄥𑄮𑄚’ 𑄃 ‘𑄢𑄧-𑄟𑄚𑄬𑄇𑄴𑄇𑄳𑄡𑄧’ 𑄌𑄨𑄉𑄮𑄚𑄧𑄖𑄴𑄪𑄚𑄴 𑄙𑄧𑄢𑄨 𑄓𑄁𑄢𑄴 𑄃𑄧𑄙𑄬 𑄃𑄧𑄙𑄬 𑄉𑄝𑄪𑄢𑄴 𑄃𑄧𑄣𑄇𑄴𑅁 𑄄𑄇𑄴𑄨𑄚𑄬 𑄖𑄢 𑄞𑄧𑄢𑄛𑄪𑄢𑄧 𑄉𑄝𑄪𑄢𑄴 𑄃𑄧𑄭𑄠𑄳𑄡𑄧𑄚𑄴𑅁 𑄆𑄇𑄴𑄘𑄨𑄚𑄳𑄡 𑄌𑄧𑄭 𑄥𑄮𑄚 𑄉𑄘𑄨𑄝𑄖𑄴𑄖𑄳𑄡𑄄 𑄊𑄘𑄧𑄖𑄴 𑄡𑄬𑄭𑄠𑄳𑄡𑄬𑄧 𑅁 𑄃𑄢𑄴 𑄃𑄪𑄎𑄪𑄟𑄧𑄚𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧𑄠𑄳𑄡 𑄉𑄘𑄨𑄝𑄖𑄴𑄖𑄳𑄡𑄠𑄴 𑄡𑄬𑄭𑄠𑄳𑄡𑄬𑅁 𑄘𑄨 𑄎𑄧𑄚𑄬 𑄛𑄚𑄨 𑄊𑄘𑄧𑄖𑄴 𑄣𑄉𑄧𑄖𑄴 𑄛-𑄛𑄨 𑄃𑄧𑄣𑄇𑄴𑅁

𑄖𑄬 𑄌𑄧𑄄 𑄥𑄮𑄚𑄢𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄇𑄧𑄖𑄴𑄬, “𑄌𑄧𑄄 𑄥𑄮𑄚 𑄌𑄧𑄄 𑄥𑄮𑄚 𑄖𑄧𑄟𑄴𑄟𑄣𑄮𑄭-𑄖𑄧𑄝𑄝𑄬 𑄃 𑄟𑄟𑄣𑄮𑄭 𑄝𑄝𑄘𑄉𑄨 𑄥𑄧𑄖𑄳𑄡𑄧 𑄉𑄧𑄌𑄴𑄌𑄳𑄡𑄧𑄚𑄴𑄘𑄬- 𑄆𑄇𑄴𑄎𑄧𑄚𑄧𑄖𑄴𑄪𑄚𑄴 𑄟𑄨𑄣 𑄛𑄪𑄠 𑄃 𑄃𑄢𑄬𑄇𑄴𑄎𑄧𑄚𑄧𑄖𑄴𑄪𑄚𑄴 𑄟𑄧𑄢𑄧𑄖𑄴 𑄛𑄪𑄠 𑄃𑄧𑄣𑄬 𑄎𑄮𑄢 𑄝𑄚𑄨 𑄘𑄨𑄝𑄇𑄴𑅁 𑄥𑄬𑄠𑄚𑄴𑄬 𑄃𑄧𑄣𑄬 𑄌𑄧𑄄 𑄥𑄮𑄚 𑄃𑄟𑄨 𑄖𑄧𑄢𑄴𑄣𑄮𑄭 𑄙𑄬𑄭 𑄡𑄬𑄭 𑄚𑄳𑄡 𑅁” 𑄖𑄬 𑄌𑄧𑄄 𑄥𑄮𑄚 𑄢𑄎𑄩 𑄃𑄧-𑄣𑄧𑅁 𑄥𑄪𑄇𑄴𑄇𑄳𑄢𑄧𑄝𑄢𑄴 𑄛𑄪𑄢𑄴 𑄒𑄨𑄉𑄴 𑄉𑄧𑄣𑄴𑄣𑄇𑄴𑅁 𑄖𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄥𑄮𑄚𑄢𑄬 𑄇𑄧𑄖𑄴𑄬, “𑄒𑄨𑄉𑄴 𑄃𑄉𑄬, 𑄆𑄡𑄬𑄖𑄴𑄬 𑄥𑄪𑄇𑄴𑄧𑄢𑄴𑄝𑄢𑄬 𑄡𑄬𑄝𑄧𑄁𑄉𑄮𑄭𑅁 𑄟𑄪𑄭 𑄊𑄮𑄢𑄝𑄪𑄠𑄣𑄮𑄭 𑄛𑄧𑄘𑄧𑄖𑄴 𑄝𑄌𑄴𑄍𑄬 𑄗𑄬𑄟𑄴𑄝𑄮𑄭𑅁 𑄌𑄧𑄄 𑄥𑄮𑄚 𑄖𑄪𑄭 𑄆𑄡𑄴 𑄝𑄪𑄏𑄧𑅁” 𑄢𑄧-𑄟𑄚𑄬𑄇𑄴𑄇𑄳𑄡𑄧𑄢𑄬 𑄌𑄧𑄄 𑄥𑄮𑄚 𑄇𑄧𑄖𑄴𑄬, “𑄃𑄧𑄘𑄬𑅁”

𑄇𑄧𑄙 𑄙𑄧𑄉𑄬 𑄙𑄧𑄉𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄌𑄧𑄄 𑄥𑄮𑄚𑄢𑄬 𑄊𑄮𑄢𑄝𑄪𑄠𑄣𑄮𑄭 𑄛𑄧𑄘𑄧𑄖𑄴 𑄝𑄌𑄴𑄍𑄬 𑄢𑄮𑄠𑄳𑄡𑄬𑄉𑄮𑄄𑅁 𑄝𑄌𑄴𑄍𑄬 𑄗𑄇𑄴𑄬 𑄗𑄇𑄴𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄦𑄧𑄢𑄚𑄴 𑄃𑄧𑄄𑄠𑄬𑅁 𑄌𑄧𑄄 𑄥𑄮𑄚 𑄖𑄳𑄡𑄪𑄃𑄧 𑄚𑄧𑄦𑄴 𑄣𑄪𑄋𑄬𑄣𑄴𑄮𑄄𑅁 𑄌𑄧𑄄 𑄥𑄮𑄚 𑄣𑄪𑄋𑄧𑄘𑄬𑄉𑄮𑄭 𑄘𑄬𑄢𑄨 𑄃𑄧𑄢𑄴 𑄇𑄨𑄚𑄳𑄡𑄖𑄳𑄡𑄄 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄥𑄇𑄴𑄇𑄩 𑄢𑄊𑄬𑄚𑄨𑄠𑄳𑄡𑄄 𑄇𑄧𑄖𑄴𑄬, “𑄉𑄎𑄧 𑄟𑄧𑄙𑄳𑄡𑄬 𑄥𑄨𑄝𑄁 𑄢𑄎 𑄥𑄇𑄴𑄩 𑄃𑄧𑄝 𑄖𑄪𑄟𑄨𑅁 𑄌𑄧𑄄 𑄥𑄮𑄚𑄣𑄮𑄭 𑄥𑄧𑄖𑄳𑄡𑄧 𑄉𑄧𑄢 𑄃𑄧𑄄𑄠𑄳𑄡𑄬𑄘𑄬 𑄘𑄬𑄌𑄴 𑄃𑄨𑄢𑄨 𑄝𑄨𑄘𑄬𑄎𑄴 𑄡𑄬𑄝𑄣𑄴𑄣𑄭𑅁 𑄌𑄧𑄄 𑄥𑄮𑄚 𑄆𑄝𑄧 𑄚𑄬 𑄚𑄧 𑄆𑄝𑄧 𑄇𑄮𑄄 𑄚𑄧 𑄛𑄢𑄧𑄋𑄧𑄢𑄴𑅁”

“𑄝𑄎𑄧 𑄟𑄧𑄙𑄳𑄡𑄬 𑄆𑄉𑄪𑄎𑄳𑄡 𑄢𑄎, 𑄥𑄇𑄴𑄩 𑄃𑄧𑄝 𑄖𑄪𑄟𑄨𑅁 𑄌𑄧𑄄 𑄥𑄮𑄚𑄣𑄮𑄄 𑄥𑄧𑄖𑄳𑄡𑄧 𑄉𑄮𑄢𑄨𑄣𑄧𑄁 𑄘𑄬𑄌𑄴 𑄃𑄨𑄢𑄨 𑄝𑄨𑄘𑄬𑄌𑄴 𑄡𑄬𑄝𑄢𑄴, 𑄌𑄧𑄄 𑄥𑄮𑄚 𑄆𑄝𑄧 𑄚 𑄚𑄧-𑄆𑄝𑄧 𑄇𑄮𑄄 𑄚𑄧 𑄛𑄢𑄧𑄋𑄧𑄢𑄴𑅁

“𑄣𑄪𑄘𑄩 𑄟𑄧𑄙𑄳𑄡𑄬 𑄊𑄨𑄣 𑄢𑄎, 𑄥𑄇𑄴𑄩 𑄃𑄧𑄝 𑄖𑄪𑄟𑄨𑅁 𑄌𑄧𑄄 𑄥𑄮𑄚𑄣𑄧𑄄 𑄥𑄧𑄖𑄳𑄡𑄧 𑄉𑄮𑄢𑄨𑄣𑄧𑄁 𑄘𑄬𑄌𑄴 𑄃𑄨𑄢𑄨 𑄝𑄨𑄘𑄬𑄌𑄴 𑄡𑄬𑄝𑄢𑄴, 𑄑𑄧𑄄 𑄥𑄮𑄚 𑄆𑄝𑄧 𑄚 𑄚𑄧-𑄆𑄝𑄧 𑄇𑄮𑄄 𑄚𑄧 𑄛𑄢𑄧𑄋𑄧𑄢𑄴𑅁

“𑄛𑄧𑄇𑄴𑄨 𑄟𑄧𑄙𑄳𑄡𑄬 𑄞𑄨𑄢𑄬𑄎𑄴 𑄢𑄎 𑄥𑄧𑄇𑄴𑄩 𑄃𑄧𑄝 𑄖𑄪𑄟𑄨𑅁 𑄌𑄧𑄄 𑄥𑄮𑄚𑄣𑄮𑄄 𑄥𑄧𑄖𑄳𑄡𑄧 𑄉𑄮𑄢𑄨𑄣𑄧𑄁 𑄘𑄬𑄌𑄴 𑄃𑄨𑄢𑄨 𑄝𑄨𑄘𑄬𑄌𑄴 𑄡𑄬𑄝𑄢𑄴, 𑄌𑄧𑄄 𑄥𑄮𑄚 𑄆𑄝𑄧 𑄚 𑄚𑄧-𑄆𑄝𑄧 𑄇𑄮𑄄 𑄚𑄧 𑄛𑄢𑄧𑄋𑄧𑄢𑄴𑅁”

“𑄟𑄎𑄧 𑄟𑄧𑄙𑄳𑄡𑄬 𑄃𑄨𑄎 𑄢𑄎 𑄥𑄇𑄴𑄩 𑄃𑄧𑄝 𑄖𑄪𑄟𑄨𑅁 𑄌𑄧𑄄 𑄥𑄮𑄚𑄣𑄮𑄄 𑄥𑄧𑄖𑄳𑄡𑄧 𑄉𑄮𑄢𑄨𑄣𑄧𑄁 𑄘𑄬𑄌𑄴 𑄃𑄨𑄢𑄨 𑄝𑄨𑄘𑄬𑄌𑄴 𑄡𑄬𑄝𑄢𑄴, 𑄌𑄧𑄄 𑄥𑄮𑄚 𑄆𑄝𑄧 𑄚 𑄚𑄧-𑄆𑄝𑄧 𑄇𑄮𑄄 𑄚𑄧 𑄛𑄢𑄧𑄋𑄧𑄢𑄴𑅁”

“𑄛𑄚𑄨 𑄟𑄧𑄙𑄳𑄡𑄬 𑄉𑄧𑄋𑄨 𑄢𑄎 𑄥𑄧𑄇𑄴𑄩 𑄃𑄧𑄝 𑄖𑄪𑄟𑄨𑅁 𑄌𑄧𑄄 𑄥𑄮𑄚𑄣𑄮𑄄 𑄥𑄖𑄳𑄡𑄧 𑄉𑄮𑄢𑄨𑄣𑄧𑄁 𑄘𑄬𑄌𑄴 𑄃𑄨𑄢𑄨 𑄝𑄨𑄘𑄬𑄌𑄴 𑄡𑄬𑄝𑄢𑄴, 𑄌𑄧𑄄 𑄥𑄮𑄚 𑄆𑄝𑄧 𑄚 𑄚𑄧-𑄆𑄝𑄧 𑄇𑄮𑄄 𑄚𑄧 𑄛𑄧𑄢𑄧𑄋𑄧𑄢𑄴𑅁”

“𑄛𑄧𑄥𑄪 𑄟𑄧𑄙𑄳𑄡𑄬 𑄥𑄨𑄁𑄦𑄧 𑄢𑄎 𑄖𑄪𑄟𑄨 𑄥𑄧𑄇𑄴𑄩 𑄃𑄧𑄝𑅁 𑄌𑄧𑄄 𑄥𑄮𑄚𑄣𑄮𑄄 𑄥𑄧𑄖𑄳𑄡𑄧 𑄉𑄮𑄢𑄨𑄣𑄧𑄁 𑄘𑄬𑄌𑄴 𑄃𑄨𑄢𑄨 𑄝𑄨𑄘𑄬𑄌𑄴 𑄡𑄬𑄝𑄢𑄴, 𑄌𑄧𑄄 𑄥𑄮𑄚 𑄆𑄝𑄧 𑄚 𑄚𑄧-𑄆𑄝𑄧 𑄇𑄮𑄄 𑄚𑄧 𑄛𑄢𑄧𑄋𑄧𑄢𑄴𑅁”

𑄃𑄨𑄚𑄴𑄘𑄨 𑄊𑄧𑄢𑄧𑄖𑄴 𑄌𑄧𑄄 𑄥𑄮𑄚𑄢𑄬 𑄝𑄮 𑄌 𑄆𑄌𑄴𑄮𑄚𑄴𑅁 𑄌𑄧𑄄 𑄥𑄮𑄚 𑄢-𑄟𑄚𑄬𑄇𑄴𑄇𑄳𑄡𑄧 𑄄𑄙𑄪 𑄙𑄬 𑄆𑄃𑄨 𑄚𑄨 𑄛𑄢𑄬𑄢𑄴𑅁 𑄢-𑄟𑄧𑄚𑄬𑄇𑄴𑄇𑄳𑄡𑄧 𑄝𑄌𑄴𑄍𑄬 𑄗𑄇𑄴𑄬 𑄗𑄇𑄴𑄬, 𑄥𑄨𑄝𑄁 𑄉𑄍𑄴, 𑄝𑄧𑄌𑄴, 𑄥𑄨𑄁𑄦𑄧, 𑄞𑄨𑄢𑄬𑄎𑄴, 𑄃𑄨𑄎, 𑄝𑄬𑄇𑄴𑄪𑄚𑄧𑄢𑄬 𑄥𑄇𑄴𑄩 𑄝𑄚𑄬𑄄𑄠𑄳𑄡𑄬 𑅁 𑄝𑄮-𑄌 𑄃𑄨𑄌𑄴𑄮𑄚𑄴 𑄖𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄃𑄨𑄙𑄪 𑄙𑄬𑄡𑄬𑄝𑄢𑄴 𑄍𑄬𑄢𑄴 𑄚𑄧-𑄛𑄢𑄴𑅁 𑄖𑄬 𑄡𑄬𑄢𑄬𑄚𑄴𑄘𑄨 𑄌𑄧𑄄 𑄥𑄮𑄚 𑄊𑄧-𑄢𑄧 𑄥𑄨𑄘𑄬𑄚𑄴𑄘𑄨 𑄝𑄬𑄢𑄴 𑄌𑄨𑄢𑄨 𑄚𑄨𑄉𑄨𑄣𑄨 𑄡𑄬𑄄𑄠𑄳𑄡𑄬𑅁 𑄖 𑄟-𑄝𑄝𑄴, 𑄞𑄬𑄭𑄝𑄮𑄚𑄴, 𑄝𑄮-𑄌 𑄆𑄌𑄴𑄍𑄳𑄡 𑄉𑄧𑄢𑄴𑄝𑄧𑄃𑄪𑄚𑄴 𑄇𑄧𑄚𑄧 𑄎𑄧𑄚𑄬 𑄇𑄮𑄄 𑄚𑄧 𑄛𑄢𑄨𑄣𑄇𑄴, 𑄖𑄬 𑄡𑄪𑄌𑄴 𑄉𑄮𑄢𑄨 𑄚𑄨𑄉𑄨𑄣𑄨 𑄡𑄘𑄬𑅁 𑄌𑄧𑄄 𑄥𑄮𑄚 𑄊𑄧𑄢𑄧𑄖𑄴𑄪𑄚𑄴 𑄚𑄨𑄉𑄨𑄣𑄨 𑄡𑄬𑄭𑄚𑄳𑄡𑄄 𑄡𑄘𑄬 𑄡𑄘𑄬 𑄢𑄧-𑄟𑄧𑄚𑄬𑄇𑄴𑄇𑄳𑄡𑄧 𑄃𑄨𑄙𑄪 𑄣𑄪𑄋𑄨𑄣𑄧𑄉𑄮𑄄𑅁 𑄌𑄧𑄄 𑄥𑄮𑄚 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄃𑄨𑄙𑄪 𑄣𑄪𑄋𑄨𑄚𑄳𑄡𑄄 𑄖𑄢 𑄘𑄨-𑄎𑄧𑄚𑄬 𑄊𑄮𑄢𑄧𑄝𑄪𑄠 𑄛𑄨𑄘𑄨𑄖𑄴 𑄃𑄪𑄘𑄨𑄣𑄇𑄴𑅁 𑄊𑄮𑄢 𑄛𑄨𑄘𑄨𑄖𑄴 𑄉𑄮𑄢𑄨 𑄡𑄘𑄬 𑄡𑄘𑄬 𑄆𑄇𑄴𑄇𑄚𑄴 𑄃𑄘𑄟𑄧𑄖𑄴 𑄣𑄪𑄋𑄨𑄣𑄇𑄴𑄮𑄄𑅁

𑄌𑄧𑄄 𑄌𑄮𑄚𑄖𑄴𑄪𑄚𑄴 𑄛𑄬𑄖𑄴 𑄛𑄪𑄢𑄬𑄣𑄴𑄣𑄮𑄄 𑄥𑄨𑄠𑄚𑄴 𑄢𑄧 𑄟𑄚𑄬𑄇𑄴𑄳𑄡𑄢𑄬 𑄇𑄧𑄣𑄧𑅁 𑄖𑄬 𑄢𑄧 𑄟𑄚𑄬𑄇𑄴𑄳𑄡 𑄌𑄧𑄄 𑄥𑄮𑄚𑄢𑄬 𑄇𑄴𑄖𑄴𑄬, “𑄟𑄪𑄄 𑄆𑄇𑄴𑄇𑄚𑄴 𑄊𑄧𑄢𑄴 𑄘𑄬𑄊𑄧𑄁𑅁” 𑄌𑄧𑄄 𑄥𑄮𑄚𑄢𑄬 𑄃𑄢𑄧 𑄇𑄴𑄖𑄴𑄬, “𑄖𑄪𑄄 𑄄𑄠𑄮𑄖𑄴 𑄗𑄇𑄴, 𑄟𑄪𑄭 𑄘𑄬𑄊 𑄡𑄠𑄴𑄘𑄬 𑄊𑄧𑄢𑄚𑄧𑄖𑄴 𑄡𑄁𑅁” 𑄖𑄬 𑄢𑄧 𑄟𑄚𑄬𑄇𑄴𑄳𑄡 𑄘𑄬𑄊 𑄡𑄠𑄴𑄘𑄬 𑄊𑄧𑄢𑄚𑄧𑄖𑄴 𑄉𑄬𑄣𑄧𑅁 𑄡𑄬𑄭𑄚𑄳𑄡𑄄 𑄘𑄬𑄊𑄬𑄘𑄬, 𑄊𑄧𑄢𑄚𑄧𑄖𑄴 𑄄𑄇𑄴𑄪𑄠 𑄝𑄪𑄢𑄟𑄨𑄣 𑄃𑄉𑄬𑅁 𑄝𑄪𑄢𑄧𑄟𑄨𑄣𑄝𑄪𑄠 𑄆𑄇𑄴𑄬𑄢𑄬 𑄉𑄪𑄎𑄧𑄁, 𑄖𑄨𑄚𑄴 𑄥𑄨𑄢 𑄆𑄉𑄧𑄖𑄴𑄧𑄢𑄴 𑄃 𑄇𑄚𑄬𑄚𑄴𑄘𑄨 𑄛𑄪𑄎𑄴 𑄉𑄧𑄣𑄬𑄢𑄴, 𑄌𑄮𑄉𑄬𑄘𑄨 𑄣𑄬𑄝𑄧𑄢𑄴 𑄉𑄧𑄣𑄬𑄢𑄴, 𑄚𑄉𑄬𑄘𑄨 𑄥𑄨𑄊𑄮𑄚𑄴 𑄘𑄬𑄢𑄴-𑄘𑄬𑄌𑄴𑄍𑄳𑄡 𑅁 𑄝𑄪𑄢𑄨𑄖𑄴𑄪𑄚𑄴 𑄥𑄖𑄴𑄪𑄠 𑄛𑄪𑄠𑅁 𑄝𑄪𑄢𑄨 𑄛𑄪𑄠𑄉𑄪𑄚𑄬 𑄌𑄧𑄢𑄖𑄴 𑄡𑄨𑄠𑄳𑄡𑄧𑄚𑄴𑅁 𑄉𑄠𑄴 𑄉𑄠𑄴 𑄝𑄪𑄢𑄨 𑄃𑄉𑄬𑅁

𑄝𑄪𑄢𑄨𑄢𑄬 𑄢𑄧 𑄟𑄚𑄬𑄇𑄴𑄳𑄡 𑄇𑄧𑄖𑄴𑄬, “𑄚𑄚𑄪 𑄝𑄪𑄢𑄨! 𑄃𑄟𑄨 𑄖𑄮𑄟 𑄄𑄙𑄪 𑄞𑄖𑄴 𑄢𑄚𑄨 𑄈𑄬𑄭 𑄛𑄢𑄨𑄝𑄧𑄁𑄚𑄨𑅁” 𑄢𑄧-𑄟𑄚𑄬𑄇𑄴𑄇𑄳𑄡𑄧𑄢𑄬 𑄝𑄪𑄢𑄨 𑄇𑄧𑄖𑄴𑄬, 𑄛𑄢𑄨𑄝 𑄛𑄢𑄨𑄝𑅁” 𑄝𑄪𑄢𑄨𑄖𑄴𑄪𑄚𑄴 𑄅𑄉𑄪𑄟𑄴 𑄛𑄬𑄭𑄚𑄳𑄡𑄄 𑄢𑄧 𑄟𑄚𑄬𑄇𑄴𑄇𑄳𑄡𑄧 𑄝𑄪𑄢𑄨𑄢𑄬 𑄇𑄧𑄖𑄴𑄬, “𑄥𑄣𑄬𑄚𑄴 𑄟𑄧 𑄟𑄮𑄇𑄴𑄮𑄢𑄬 𑄄𑄙𑄪 𑄘𑄨 𑄛𑄘𑄁𑄉𑄮𑅆 𑅁 𑄢𑄧 𑄟𑄚𑄬𑄇𑄴𑄇𑄳𑄡𑄧 𑄌𑄧𑄄 𑄥𑄮𑄚𑄢𑄬 𑄇𑄧𑄎 𑄆𑄖𑄴𑄬 𑄝𑄪𑄢𑄨𑄢𑄬 𑄛𑄨𑄖𑄴 𑄘𑄨𑄠𑄳𑄡𑄬 -𑄃𑄧 𑄝𑄪𑄢𑄨 𑄃𑄧𑄣𑄮𑄚𑄴 𑄥𑄣𑄚𑄧𑄖𑄴 𑄛𑄚𑄨 𑄔𑄣𑄨 𑄘𑄨𑄚𑄳𑄡𑄄 𑄞𑄨𑄎𑄬 𑄘𑄨𑄠𑄳𑄡𑄬𑅁 𑄘𑄢𑄴𑄝𑄪𑄠 𑄞𑄨𑄎 𑄞𑄨𑄎 𑄉𑄮𑄢𑄨 𑄘𑄨𑄠𑄬𑅁 𑄛𑄨𑄣𑄝𑄪𑄠𑄠𑄳𑄡𑄧 𑄛𑄚𑄨 𑄛𑄧𑄢𑄨𑄝𑄖𑄳𑄡𑄴𑄄 𑄇𑄚 𑄉𑄮𑄢𑄨 𑄘𑄨𑄠𑄬𑅁

𑄌𑄧𑄄 𑄥𑄮𑄚 𑄝𑄖𑄴 𑄢𑄚𑄨𑄝𑄖𑄳𑄡𑄴𑄄 𑄝𑄪𑄢𑄨 𑄊𑄧𑄢𑄧𑄖𑄴 𑄆𑄣𑄧𑅁 𑄞𑄨𑄎 𑄃𑄧𑄣𑄮𑄚𑄴𑄥𑄣𑄴, 𑄞𑄨𑄎 𑄘𑄢𑄴𑄝𑄪𑄠𑄣𑄮𑄄 𑄇𑄧𑄚𑄧 𑄝𑄝𑄧𑄘𑄬 𑄌𑄧𑄄 𑄥𑄮𑄚 𑄃𑄉𑄪𑄚𑄴 𑄎𑄳𑄝𑄣𑄬𑄣𑄧𑅁 𑄞𑄖𑄴𑄪𑄚𑄴 𑄛𑄖𑄴 𑄘𑄨𑄣𑄧𑅁 𑄇𑄚 𑄛𑄨𑄨𑄣, 𑄇𑄚𑄝𑄪𑄠𑄘𑄨 𑄃𑄉𑄪𑄚𑄧𑄖𑄴 𑄛𑄚𑄨 𑄛𑄧𑄢𑄬𑅁 𑄛𑄚𑄨 𑄛𑄧𑄣𑄴𑄬 𑄃𑄉𑄪𑄚𑄴 𑄟𑄧𑄢𑄬𑅁 𑄌𑄧𑄄 𑄥𑄮𑄚 𑄃𑄉𑄪𑄚𑄴 𑄜𑄪𑄚𑄴 𑄘𑄨𑄘𑄨 𑄃𑄢𑄧 𑄎𑄳𑄝𑄣𑅆 𑅁 𑄃𑄉𑄪𑄚𑄚𑄴 𑄜𑄪𑄚𑄴 𑄘𑄬𑄘𑄬 𑄘𑄬𑄘𑄬 𑄌𑄧𑄄 𑄥𑄮𑄚 𑄌𑄮𑄇𑄴𑄪𑄚𑄴 𑄢𑄋 𑄃𑄧𑄄𑄠𑄳𑄡𑄧𑄚𑄴𑅁 𑄝𑄧𑄣𑄴 𑄛𑄧𑄡𑄳𑄡𑄬 𑄃 𑄟𑄙𑄖𑄴 𑄙𑄧𑄡𑄳𑄡𑄬𑅁 𑄞𑄖𑄴 𑄢𑄚 𑄘𑄬𑄢𑄩 𑄃𑄧𑄢𑄴 𑄇𑄨𑄚𑄳𑄡𑄄 𑄌𑄧𑄄 𑄥𑄮𑄚𑄢𑄬 𑄢𑄧 𑄟𑄚𑄬𑄇𑄴𑄇𑄳𑄡𑄧 𑄇𑄧𑄖𑄴𑄬-

𑄉𑄎𑄧 𑄟𑄧𑄙𑄳𑄡𑄬 𑄥𑄨𑄝𑄁 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄝𑄎𑄧 𑄟𑄧𑄙𑄳𑄡𑄬 𑄆𑄉𑄪𑄎𑄳𑄡 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄛𑄧𑄥𑄪 𑄟𑄧𑄙𑄳𑄡𑄬 𑄥𑄨𑄁𑄦𑄧 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄛𑄧𑄇𑄴𑄩 𑄟𑄧𑄙𑄳𑄡𑄬 𑄞𑄨𑄢𑄬𑄎𑄴 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄟𑄎𑄧 𑄟𑄧𑄙𑄳𑄡𑄬 𑄄𑄎 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄛𑄚𑄨 𑄟𑄧𑄙𑄳𑄡𑄬 𑄉𑄮𑄋𑄴𑄄 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄌𑄧𑄄 𑄥𑄮𑄚 𑄆𑄘𑄧𑄇𑄴𑄧𑄚𑄴 𑄇𑄨 𑄉𑄧𑄢𑄬𑄢𑄴 𑄇𑄮𑄄 𑄚𑄧 𑄛𑄢𑄧𑄁𑄢𑄴𑅁

𑄌𑄧𑄄 𑄥𑄮𑄚 𑄢𑄧 𑄟𑄚𑄬𑄇𑄴𑄇𑄳𑄡𑄧 𑄇𑄧𑄙𑄚𑄨 𑄥𑄪𑄪𑄚𑄨𑄚𑄳𑄡𑄄 𑄇𑄧𑄖𑄴𑄬, “𑄃𑄧𑄣𑄮𑄚𑄴𑄥𑄣𑄴 𑄃𑄧𑄄𑄠𑄳𑄡𑄬 𑄞𑄨𑄎, 𑄘𑄢𑄴𑄝𑄪𑄠 𑄃𑄧𑄄𑄠𑄳𑄡𑄬 𑄞𑄨𑄎, 𑄛𑄨𑄣 𑄃𑄧𑄄𑄠𑄳𑄡𑄬 𑄇𑄚, 𑄌𑄧𑄚𑄴𑄌𑄧𑄚𑄴 𑄛𑄚𑄨 𑄛𑄧𑄢𑄬𑅁” 𑄌𑄧𑄄 𑄥𑄮𑄚 𑄇𑄧𑄙𑄚𑄨 𑄢𑄧 𑄟𑄚𑄬𑄇𑄴𑄇𑄳𑄡𑄧 𑄥𑄪𑄚𑄨𑄚𑄬𑄭 𑄢𑄧 𑄟𑄚𑄬𑄇𑄴𑄇𑄳𑄡𑄧 𑄌𑄧𑄄 𑄥𑄮𑄚 𑄄𑄙𑄪 𑄉𑄬𑄣𑄧𑅁 𑄡𑄬𑄭𑄭𑄚𑄳𑄡𑄡𑄬𑄭 𑄢𑄧 𑄟𑄚𑄬𑄇𑄴𑄇𑄳𑄡𑄧 𑄘𑄬𑄉𑄬𑄖𑄴𑄬, 𑄌𑄧𑄄 𑄥𑄮𑄚 𑄃𑄉𑄪𑄚𑄴 𑄜𑄪𑄚𑄴 𑄘𑄬𑄘𑄬 𑄘𑄬𑄘𑄬, 𑄖 𑄌𑄮𑄇𑄴𑄪𑄚𑄴 𑄢𑄋 𑄃𑄧𑄄 𑄡𑄬𑄭𑄠𑄧𑄚𑄴𑄘𑄮𑄭𑅁 𑄖𑄬 𑄢𑄧 𑄟𑄚𑄬𑄇𑄴𑄇𑄳𑄡𑄧𑄠𑄳𑄡𑄧 𑄌𑄧𑄄 𑄥𑄮𑄚𑄢𑄬 𑄞𑄖𑄴 𑄢𑄚 𑄝𑄧𑄣𑄴 𑄘𑄨𑄣𑄧𑅁 𑄦𑄘-𑄃𑄖𑄳𑄡 𑄢𑄚𑄨𑄣𑄇𑄴𑅁 𑄞𑄖𑄴𑄪𑄚𑄴 𑄜𑄪𑄘𑄨𑄣𑄇𑄴𑅁 𑄇𑄧𑄣 𑄛𑄘𑄣𑄮𑄭 𑄞𑄖𑄴𑄪𑄚𑄴 𑄟𑄧𑄎 𑄉𑄮𑄢𑄨𑄣𑄇𑄴𑅁 𑄢𑄧 𑄟𑄚𑄬𑄇𑄴𑄇𑄳𑄡𑄧 𑄃 𑄌𑄧𑄄 𑄥𑄮𑄚 𑄘𑄳𑄝𑄨 𑄎𑄧𑄚𑄬 𑄞𑄖𑄴𑄪𑄚𑄴 𑄟𑄧𑄎 𑄉𑄧𑄖𑄴𑄬 𑄍𑄧𑄣𑄖𑄴 𑄝𑄪𑄢𑄨 𑄢𑄧 𑄟𑄚𑄬𑄇𑄴𑄇𑄳𑄡𑄧 𑄘𑄉𑄨 𑄊𑄮𑄢𑄝𑄪𑄠 𑄣𑄬𑄌𑄴𑄌𑄚𑄧𑄖𑄴 𑄥𑄎𑄧𑄚𑄳𑄡 𑄃𑄧𑄇𑄴𑄖𑄧𑄖𑄴 𑄥𑄎𑄳𑄡𑄧 𑄝𑄨𑄎𑄨 𑄆𑄇𑄴 𑄟𑄧𑄎 𑄝𑄚𑄨 𑄘𑄨-𑄣𑄧𑄉𑄮𑄭𑅁 𑄖𑄬 𑄢𑄧 𑄟𑄚𑄬𑄇𑄴𑄇𑄳𑄡𑄧 𑄃 𑄌𑄧𑄄 𑄥𑄮𑄚 𑄝𑄪𑄢𑄨 𑄊𑄮𑄢𑄚𑄧𑄖𑄴𑄪𑄚𑄴 𑄉𑄬𑄣𑄇𑄴𑄮𑄄𑅁

𑄖𑄬 𑄝𑄪𑄢𑄨𑄢𑄴 𑄥𑄖𑄴𑄪𑄠 𑄛𑄪𑄠 𑄍𑄧𑄢𑄖𑄴𑄪𑄚𑄴 𑄊𑄧𑄢𑄧𑄖𑄴 𑄣𑄪𑄋𑄨𑄣𑄇𑄴𑄮𑄄𑅁 𑄝𑄪𑄢𑄨 𑄖 𑄛𑄪𑄠𑄉𑄪𑄚𑄧 𑄍𑄧𑄢𑄖𑄴𑄪𑄚𑄴 𑄊𑄧𑄢𑄧𑄖𑄴 𑄘𑄬𑄢𑄩𑄠𑄬 𑄣𑄪𑄋𑄨𑄚𑄳𑄡𑄄 𑄖 𑄛𑄪𑄠𑄉𑄪𑄚𑄧𑄢𑄬 𑄉𑄬𑄣𑄴 𑄘𑄬𑄢𑄴, “𑄟𑄧𑄢𑄢𑄴 𑄛𑄪𑄘𑄴 𑄣𑄧𑄇𑄴 𑄆𑄘𑄧𑄇𑄴𑄧𑄚𑄴 𑄖𑄨 𑄉𑄧𑄢𑄧𑄢𑄴𑅃 𑄘𑄨𑄝 𑄗𑄬𑄁 𑄢𑄋 𑄢𑄋 𑄝𑄎 𑄇𑄧𑄘𑄮𑄢𑄴 𑄆𑄌𑄴𑄍𑄳𑄡𑄪𑄚𑄴𑅁 𑄖𑄪𑄟𑄨 𑄉𑄧𑄟𑄴 𑄃𑄧𑄘 𑄏𑄘𑄨 𑄣𑄪𑄟𑄨𑄘𑄉𑄨 𑄥𑄣𑄬 𑄈𑄬𑄭 𑄛𑄬𑄘𑄪𑄁𑅁” 𑄝𑄪𑄢𑄨𑄢𑄴 𑄥𑄖𑄴𑄪𑄠 𑄛𑄪𑄠 𑄝𑄪𑄢𑄨𑄢𑄬 𑄇𑄧𑄘𑄧𑄚𑄴𑄘𑄬, 𑄖𑄢 𑄇𑄧𑄘𑄧𑄇𑄴𑄧𑄚𑄴 𑄃𑄧𑄄𑄠𑄬 𑄡𑄨𑄠𑄨𑄚𑄴𑄘𑄬𑅃 𑄝𑄪𑄢𑄨 𑄖 𑄛𑄪𑄠𑄅𑄚𑄧𑄢𑄬 𑄇𑄧𑄖𑄴𑄬, 𑄝𑄬𑄎𑄴 𑄘𑄬𑄢𑄩 𑄚𑄧-𑄃𑄧𑄠𑄴 𑄡𑄨𑄠𑄧𑄚𑄴𑄘𑄬𑅁 𑄆𑄝𑄧 𑄣𑄉𑄧𑄖𑄴 𑄛𑄬𑄝𑄉𑄮𑄭𑅁 𑄝𑄪𑄢𑄨 𑄛𑄪-𑄃𑄧𑄉𑄪𑄚𑄬 𑄥𑄧𑄣𑄴𑄣 𑄉𑄮𑄢𑄨 𑄖𑄢 𑄌𑄨𑄉𑄮𑄚𑄴 𑄞𑄬𑄭𑄝𑄪𑄠 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡𑄢𑄬 𑄞𑄖𑄴 𑄟𑄧𑄎𑄣𑄮𑄭 𑄡𑄬𑄝𑄖𑄴𑄖𑄳𑄡𑄄 𑄇𑄮𑄄 𑄉𑄬𑄣𑄇𑄴𑅁

𑄍𑄧 𑄞𑄬𑄭𑄠𑄳𑄡𑄬 𑄃𑄇𑄴𑄬 𑄃𑄇𑄴𑄬 𑄊𑄬𑄣𑄇𑄴 𑄌𑄧𑄄 𑄥𑄮𑄚 𑄃 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄘𑄉𑄨𑄢𑄬 𑄣𑄧𑄢𑅁 𑄥𑄧𑄡𑄳𑄡𑄧 𑄛𑄪𑄣𑄪𑄚𑄴 𑄃𑄘𑄬𑄭 𑄃𑄘𑄬𑄭 𑄡𑄘𑄬 𑄡𑄘𑄬 𑄍𑄧 𑄞𑄬𑄭𑄠𑄳𑄡𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄃 𑄌𑄧𑄄 𑄥𑄮𑄚 𑄘𑄉𑄨𑄢𑄬 𑄣𑄊𑄧𑄖𑄴 𑄛𑄨𑄠𑄧𑄚𑄴𑄘𑄮𑄭𑅁 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄍𑄧 𑄞𑄬𑄭𑄠𑄳𑄡𑄧𑄢𑄬 𑄇𑄝𑄨𑄚𑄳𑄡𑄄 𑄟𑄢𑄬 𑄜𑄬𑄣𑄬𑄭𑄠𑄳𑄡𑄬𑅁 𑄝𑄬𑄊𑄧 𑄥𑄬𑄎𑄬𑄚𑄴𑄘𑄨 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄘𑄪𑄣𑄧𑄁 𑄘𑄣𑄁 𑄉𑄮𑄢𑄨 𑄣𑄪𑄋𑄳𑄡𑄬𑄉𑄮𑄄𑅁 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡𑄢𑄬 𑄘𑄬𑄉𑄨𑄚𑄳𑄡𑄄 𑄇𑄧𑄖𑄴𑄬, “𑄃𑄠𑄴 𑄃𑄠𑄴, 𑄖𑄧𑄢𑄬𑄠𑄳𑄡𑄧 𑄆𑄇𑄴𑄪 𑄇𑄪𑄝𑄬 𑄟𑄢𑄬𑄭 𑄜𑄬𑄣𑄁𑅁 𑄘𑄬𑄊𑄧𑄌𑄴, 𑄌, 𑄖𑄳𑄦𑄧 𑄞𑄬𑄭𑄠𑄳𑄡𑄪𑄚𑄧𑄢𑄬 𑄟𑄢𑄬𑄭 𑄜𑄬𑄣𑄴𑄣𑄧𑄁𑅁” 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄇𑄧𑄙𑄚𑄨 𑄥𑄪𑄚𑄨𑄚𑄬𑄭 𑄢𑄧-𑄟𑄚𑄬𑄇𑄴𑄇𑄳𑄡𑄧𑄢𑄬 𑄒𑄬𑄁 𑄝𑄬𑄢𑄬𑄭 𑄥𑄣𑄟𑄴 𑄉𑄮𑄢𑄨 𑄛𑄧𑄣𑄴𑄧𑅁 𑄌𑄧𑄄 𑄥𑄮𑄚 𑄢𑄧-𑄟𑄚𑄬𑄇𑄴𑄇𑄳𑄡𑄧𑄢𑄬 𑄇𑄧𑄠𑄴𑄘𑄬, “𑄇𑄝𑄨 𑄜𑄬𑄣𑅁” 𑄖𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄇𑄧𑄠𑄘𑄬, 𑄗𑄮𑄇𑄴 𑄚𑄧-𑄇𑄝𑄨𑄟𑄴𑅁 𑄃𑄟 𑄥𑄧𑄟𑄢𑄬 𑄝𑄨𑄣𑄬 𑄖𑄬 𑄛𑄪𑄚𑄴 𑄙𑄫𑄠𑄚𑄨 𑄉𑄮𑄣𑄟𑄴 𑄗𑄬𑄝𑄧𑅁 𑄖𑄬 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡𑄢𑄬 𑄢𑄉𑄬𑄣𑄇𑄴𑅁 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡𑄢𑄬 𑄢𑄉𑄬𑄚𑄬𑄭 𑄖𑄬 𑄥𑄪𑄟𑄪𑄖𑄴𑄧 𑄞𑄖𑄴 𑄈𑄬𑄣𑄇𑄴𑅁 𑄞𑄖𑄴 𑄈𑄬𑄭𑄚𑄳𑄡𑄄 𑄢𑄧-𑄟𑄚𑄬𑄇𑄴𑄇𑄳𑄡𑄧𑄢𑄴 𑄃𑄊 𑄆𑄡𑄬𑄢𑄴𑅁 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡𑄢𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄇𑄧𑄖𑄴𑄬, “𑄡𑄬𑄭 𑄃𑄊𑄨𑄉𑄮𑄭𑅁” 𑄖𑄬 𑄃𑄊 𑄉𑄬𑄣𑄇𑄴𑅁 𑄃𑄊𑄨 𑄜𑄪𑄢𑄬𑄚𑄬𑄭 𑄜𑄨𑄢𑄨 𑄆𑄣𑄇𑄴𑅁 𑄥𑄨𑄠𑄧𑄖𑄴𑄪𑄚𑄴 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄥𑄪𑄟𑄪𑄖𑄴𑄧 𑄉𑄬𑄣𑄇𑄴𑄮𑄄𑅁 𑄃-𑄢𑄧 𑄆𑄇𑄴𑄇𑄚𑄴 𑄎𑄉𑄖𑄴 𑄣𑄋𑄨𑄣𑄇𑄴𑄮𑄄𑅁 𑄥𑄬 𑄎𑄉𑄚𑄧𑄖𑄴 𑄖𑄨𑄚𑄴 𑄎𑄧𑄚𑄬 𑄞𑄖𑄴 𑄈𑄬𑄣𑄇𑄴𑅁

𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄢𑄧-𑄟𑄚𑄬𑄇𑄴𑄇𑄳𑄡𑄧𑄢𑄬 𑄇𑄧𑄖𑄴𑄬, “𑄘𑄘 𑄖𑄪𑄄 𑄃𑄊𑄧𑄘𑄬 𑄟𑄙 𑄚𑄨𑄉𑄪𑄢𑄨 𑄃𑄉𑄧𑄎𑄴𑅁 𑄦𑄧𑄢𑄧-𑄉𑄴𑄃𑄚𑄴 𑄖𑄧𑄟𑄪𑄎𑄪𑄋𑄬 𑄟𑄧𑄘𑄨𑄖𑄴 𑄇𑄪𑄝𑄨 𑄗𑄧𑄌𑄴𑅁 𑄥𑄨𑄘𑄪𑄇𑄴𑄇𑄳𑄡𑄉𑄮𑄢𑄨 𑄝𑄊𑄴 𑄆𑄖𑄴𑄖𑄧𑄚𑄴, 𑄚𑄬 𑄥𑄛𑄴 𑄆𑄖𑄴𑄖𑄧𑄚𑄴 𑄚𑄧 𑄘𑄬𑄊𑄧𑄌𑄴𑅁 𑄖𑄬 𑄟𑄧𑄢𑄬 𑄡𑄬𑄇𑄴𑄬 𑄌𑄪𑄇𑄨𑄘𑄢𑄴 𑄢𑄧𑄊𑄬𑄠𑄳𑄡𑄌𑄴 𑄦𑄧𑄢𑄴𑄉𑄧𑄠𑄚𑄴 𑄟𑄧𑄢𑄬 𑄙𑄧𑄢𑄨 𑄗𑄬𑄝𑄖𑄴𑄖𑄳𑄡𑄧𑄄 𑄘𑄨𑄌𑄴 𑄚𑅁 𑄟𑄪𑄄 𑄥𑄨𑄉𑄪𑄚 𑄆𑄣𑄬 𑄇𑄝𑄨 𑄘𑄨 𑄛𑄢𑄨𑄟𑄴𑅁

𑄢𑄧-𑄟𑄚𑄬𑄇𑄴𑄇𑄳𑄡𑄧𑄢𑄴 𑄃-𑄢𑄧 𑄃𑄊 𑄆𑄡𑄬𑄢𑄴𑅁 𑄛𑄬𑄖𑄴𑄖𑄪𑄠 𑄦𑄪𑄣𑄪𑄋𑄳𑄡𑄢𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄃-𑄢𑄧 𑄃𑄊 𑄥𑄣𑄧𑄖𑄴 𑄥𑄋𑄬𑄖𑄴 𑄚𑄨𑄣𑄧𑅁 𑄘𑄨-𑄎𑄚𑄬 𑄃𑄉 𑄉𑄬𑄣𑄇𑄴𑅁 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄃𑄉 𑄥𑄣𑄧𑄖𑄴 𑄝𑄧𑄎𑄨𑄣𑄧𑅁 𑄟𑄙 𑄚𑄨𑄉𑄪𑄢𑄨 𑄢-𑄟𑄚𑄬𑄇𑄴𑄇𑄳𑄡 𑄃𑄊 𑄥𑄣𑄧𑄖𑄴 𑄝𑄮𑄄𑄚𑄳𑄡𑄄, 𑄦𑄧𑄢𑄴𑄉𑄧𑄃𑄚𑄴 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄦𑄘𑄧𑄖𑄴 𑄘𑄨𑄣𑅁 𑄖𑄬 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄟𑄘 𑄚𑄨𑄉𑄪𑄢𑄨 𑄃𑄊𑄬𑄖𑄴𑄬 𑄍𑄧𑄣𑄖𑄴 𑄦𑄧𑄢𑄧-𑄉𑄴𑄃𑄚𑄴𑄘𑄮𑄄 𑄆𑄇𑄴𑄪𑄝𑄬 𑄢𑄧-𑄟𑄚𑄬𑄇𑄴𑄇𑄳𑄡𑄢𑄴 𑄉𑄧𑄖𑄴𑄧𑄚 𑄍𑄨𑄚𑄬 𑄘𑄨𑄚𑄳𑄡𑄄 𑄟𑄢𑄬 𑄜𑄬𑄣𑄴𑄬𑅁

𑄛𑄬𑄖𑄴𑄪𑄠 𑄦𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄪𑄣𑄪𑄋𑄳𑄡 𑄌𑄧𑄄 𑄥𑄮𑄚 𑄄𑄙𑄪 𑄆𑄄𑄚𑄳𑄡𑄄 𑄇𑄧𑄖𑄴𑄬, “𑄌𑄧𑄄 𑄥𑄮𑄚, 𑄖𑄪𑄄 𑄟𑄧𑄢𑄬 𑄣𑄧𑄝𑄬, 𑄚 𑄚𑄧 𑄣𑄧𑄝𑄬 𑄇𑄧-𑄃𑄧𑅁 𑄖𑄧 𑄚𑄬𑄇𑄴𑄪𑄠𑄢𑄬 𑄟𑄪𑄄 𑄦𑄧𑄢𑄧𑄉𑄴𑄃𑄚𑄴𑄘𑄮𑄄 𑄆𑄇𑄴 𑄇𑄪𑄝𑄬 𑄟𑄢𑄬 𑄜𑄬𑄣𑄴𑄣𑄳𑄡𑄪𑄁𑅁” 𑄥𑄮𑄚 𑄇𑄧𑄣𑄧, “𑄇𑄧𑄛𑄴𑄛𑄳𑄡𑄧𑄌𑄴 𑄃 𑄟𑄢𑄬 𑄜𑄬𑄣𑄴𑄣𑄳𑄡𑄮𑄌𑄴 𑄡𑄧𑄉𑄧𑄚𑄴, 𑄟𑄪𑄄 𑄇𑄣𑄴𑄮𑄄 𑄝𑄎𑄨𑄟𑄴𑅁 𑄃 𑄖𑄧𑄢𑄬 𑄣𑄧𑄟𑄴𑄝𑄬𑄘𑄬𑅁” 𑄌𑄧𑄄 𑄥𑄮𑄚 𑄃 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄄𑄇𑄴𑄪𑄠 𑄍𑄬𑄚𑄴𑄪𑄠 𑄦𑄧𑄢𑄨𑄋 𑄡𑄖𑄴𑄬 𑄘𑄬𑄇𑄴𑄧𑄚𑄴𑅁 𑄌𑄧𑄄 𑄥𑄮𑄚 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡𑄢𑄬 𑄓𑄉𑄨 𑄇𑄧𑄖𑄴𑄬 𑄃 𑄃𑄟 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄗𑄇𑄴𑄬, 𑄃𑄟𑄢𑄬 𑄍𑄬𑄚𑄴𑄪𑄠 𑄦𑄧𑄢𑄨𑄋𑄴𑄪𑄠 𑄟𑄢𑄨 𑄘𑄨-𑄘𑄧𑅁” “𑄝! 𑄝! 𑄝𑄚 𑄖𑄧 𑄢𑄧-𑄟𑄚𑄨𑄇𑄴𑄇𑄳𑄡𑄧 𑄗𑄬𑄣𑄬 𑄖𑄬 𑄦𑄧𑄢𑄨𑄋𑄴𑄪𑄠 𑄟𑄢𑄨 𑄘𑄨𑄖𑄴 𑄛𑄢𑄬𑄘𑄬𑅃 𑄃𑄟𑄨 𑄇𑄨 𑄟𑄢𑄨 𑄘𑄨𑄖𑄴 𑄚𑄧-𑄛𑄢𑄬𑅃 𑄇𑄧𑄣𑄧 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡𑅁 𑄌𑄧𑄄 𑄥𑄮𑄚 𑄇𑄧𑄖𑄴𑄬, “𑄘𑄬 𑄘𑄬 𑄟𑄢𑄨 𑄘𑄨-𑄛𑄣𑄴𑄬 𑄟𑄢𑄨 𑄘𑄬𑄊𑄮𑄄 𑄡𑅁”

𑄦𑄧𑄨𑄢𑄋𑄴-𑄋𑄪𑄠 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄟𑄢𑄨 𑄝𑄖𑄴𑄖𑄳𑄡𑄄 𑄡𑄘𑄬 𑄄𑄇𑄴𑄇𑄳𑄡𑄧 𑄃𑄢𑄴 𑄃𑄉𑄬𑅁 𑄥𑄬 𑄃𑄢𑄴 𑄊𑄨𑄢𑄝𑄪𑄠 𑄟𑄙 𑄚𑄨𑄉𑄪𑄢𑄨 𑄛𑄢𑄴 𑄃𑄧𑄖𑄴𑄬 𑄍𑄧𑄣𑄖𑄴 𑄥𑄬 𑄥𑄪𑄡𑄮𑄉𑄧𑄖𑄴 𑄌𑄧𑄄 𑄥𑄮𑄚 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡𑄢𑄴 𑄦𑄧𑄢𑄧𑄉𑄴 𑄃𑄚𑄴𑄘𑄮𑄄 𑄃𑄬𑄇𑄴 𑄇𑄪𑄝𑄬 𑄉𑄧𑄖𑄴𑄖𑄧𑄚𑄧𑄝𑄪𑄠 𑄍𑄨𑄚𑄬𑄄 𑄘𑄨𑄠𑄬𑅁 𑄖𑄬 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄟𑄧𑄢𑄨 𑄉𑄬𑄣𑄧𑅁 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄟𑄧𑄢𑄨 𑄡𑄬𑄄𑄚𑄳𑄡𑄄, 𑄌𑄧𑄄 𑄥𑄮𑄚 𑄢𑄧-𑄟𑄚𑄬𑄇𑄴𑄇𑄳𑄡𑄧𑄢𑄬 𑄌𑄧𑄚𑄴𑄘𑄧𑄚𑄴 𑄛𑄚𑄨 𑄡𑄪𑄉𑄪𑄣𑄬𑄄𑄠𑄳𑄡𑄬𑅁” 𑄖𑄬 𑄇𑄧𑄖𑄴𑄬, “𑄌𑄧𑄚𑄴𑄘𑄧𑄚𑄴 𑄛𑄚𑄨 𑄄𑄎𑄨 𑄘𑄨𑄠𑄳𑄡𑄁, 𑄎𑄨𑄠𑄮𑄚𑄴 𑄝𑄨𑄎𑄮𑄚𑄴𑄘𑄮𑄄 𑄝𑄨𑄎𑄨 𑄘𑄨𑄠𑄳𑄡𑄁𑅁” 𑄖𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄎𑄬𑄘 𑄃𑄧𑄄𑄠𑄳𑄡𑄬𑅁

𑄢𑄧-𑄟𑄚𑄬𑄇𑄴𑄇𑄳𑄡𑄧 𑄎𑄬𑄘 𑄃𑄧𑄄𑄚𑄳𑄡𑄄 𑄌𑄧𑄄 𑄥𑄮𑄚𑄢𑄬 𑄇𑄧𑄖𑄴𑄬, “𑄟𑄧𑄢𑄬 𑄆𑄘𑄧𑄇𑄴𑄈𑄧𑄚𑄴 𑄇𑄨𑄖𑄴𑄖𑄳𑄡𑄄 𑄚𑄧 𑄎𑄉𑄌𑄴𑅃 𑄃𑄨𑄇𑄴𑄬 𑄖𑄬 𑄊𑄪𑄟𑄧𑄖𑄴𑄪𑄚𑄴 𑄅𑄘𑄨𑄣𑄪𑄁𑄉𑄬𑅁” 𑄌𑄧𑄄 𑄥𑄮𑄚 𑄢𑄧-𑄟𑄚𑄬𑄇𑄴𑄇𑄳𑄡𑄢𑄬 𑄇𑄧𑄖𑄴𑄬 “ 𑄄-𑄄, 𑄖𑄧𑄢𑄬 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡𑄢𑄬 𑄟𑄢𑄬 𑄛𑄬𑄣 𑄇𑄮𑄄𑄠𑄳𑄡𑄁𑄉𑄬 𑄚𑄧 𑄥𑄪𑄚𑄌𑄴𑅁 𑄖𑄪𑄄 𑄡𑄬𑄇𑄴𑄬 𑄟𑄙 𑄚𑄨𑄉𑄪𑄢𑄨 𑄃𑄊 𑄥𑄣𑄧𑄖𑄴 𑄝𑄮𑄌𑄴𑄌𑄳𑄡𑄧𑄌𑄴, 𑄥𑄬𑄇𑄴𑄬 𑄖𑄧𑄢𑄬 𑄖𑄧 𑄦𑄧𑄢𑄧-𑄉𑄴 𑄃𑄚𑄴𑄘𑄮𑄄 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄆𑄇𑄴 𑄇𑄪𑄝𑄬 𑄟𑄢𑄬 𑄜𑄬𑄣𑄴𑄬𑄘𑄬 𑄈𑄧𑄝𑄧𑄢𑄴 𑄚𑄧𑄛𑄌𑄴𑅁” 𑄌𑄧𑄄 𑄥𑄮𑄚 𑄢𑄧-𑄟𑄚𑄬𑄇𑄴𑄇𑄳𑄡𑄧𑄢𑄬 𑄛𑄬𑄖𑄴𑄪𑄠 𑄦𑄪𑄣𑄪𑄋𑄳𑄡 𑄇𑄧𑄙 𑄇𑄮𑄄 𑄜𑄪𑄢𑄬𑄚𑄳𑄡𑄄 𑄘𑄨-𑄎𑄧𑄚𑄬 𑄥𑄨𑄠𑄧𑄖𑄴𑄪𑄚𑄴 𑄉𑄬𑄣𑄇𑄴𑄮𑄄𑅁

𑄖𑄬 𑄖𑄢 𑄟𑄧𑄣𑄧𑄚𑄩 𑄥𑄪𑄚𑄴𑄘𑄧𑄢𑄩 𑄝𑄎𑄢𑄧 𑄇𑄠𑄴 𑄣𑄪𑄋𑄨𑄣𑄇𑄴𑄮𑄄𑅁 𑄝𑄎𑄢𑄧 𑄇𑄪𑄢𑄬 𑄣𑄪𑄋𑄨𑄚𑄳𑄡𑄄 𑄌𑄧𑄄 𑄥𑄮𑄚𑄣𑄮𑄄 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄃𑄨𑄇𑄴𑄇𑄳𑄡𑄧 𑄉𑄎𑄧𑄖𑄴𑄧𑄣𑄬 𑄝𑄮𑄌𑄴𑄍𑄪𑄠𑄳𑄡𑄧𑄚𑄴𑅁 𑄖𑄢 𑄟𑄪𑄎𑄪𑄋𑄬𑄚𑄴𑄘𑄨 𑄝𑄎𑄢𑄧 𑄛𑄪-𑄠𑄧 𑄟𑄣𑄧𑄚𑄩 𑄥𑄪𑄪𑄚𑄴𑄘𑄧𑄢𑄨 𑄝𑄎𑄢𑄧𑄖𑄴 𑄡𑄘𑄧𑄚𑄴𑅁 𑄖𑄬 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄌𑄧𑄄 𑄥𑄮𑄚𑄢𑄬 𑄇𑄧𑄖𑄴𑄬, “𑄌𑄧𑄄 𑄥𑄮𑄚 𑄖𑄪𑄄 𑄃𑄨𑄠𑄮𑄖𑄴 𑄗𑄇𑄴𑅁 𑄟𑄪𑄄 𑄆𑄇𑄴𑄬𑄚 𑄟𑄣𑄧𑄚𑄩 𑄥𑄪𑄚𑄴𑄘𑄧𑄢𑄨 𑄝𑄎𑄢𑄴 𑄊𑄪𑄢𑄨 𑄌𑄁𑄉𑄮𑄄𑅁” 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄝𑄎𑄢𑄧𑄖𑄴 𑄡𑄘𑄬 𑄌𑄧𑄄 𑄥𑄮𑄚 𑄖𑄢𑄬 𑄇𑄧𑄖𑄴𑄬, “𑄇𑄪𑄟𑄢𑄴 𑄖𑄨𑄚𑄴 𑄇𑄪𑄚𑄴 𑄝𑄬𑄢𑄬𑄌𑄴 𑄇𑄨𑄚𑄴𑄖𑄪 𑄆𑄇𑄴 𑄇𑄪𑄚𑄴 𑄚𑄧 𑄝𑄬𑄢𑄬𑄌𑄴𑅁” 𑄟𑄣𑄧𑄚𑄩 𑄥𑄪𑄚𑄴𑄘𑄧𑄢𑄨 𑄝𑄎𑄢𑄧𑄖𑄴 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄖𑄨𑄚𑄴 𑄇𑄪𑄚𑄴 𑄝𑄬𑄢𑄬𑄚𑄳𑄡𑄄 𑄇𑄨𑄌𑄴𑄍𑄪 𑄚𑄧 𑄛𑄬𑄣𑄧𑄃𑅁 𑄃𑄢𑄴𑄧 𑄚𑄧 𑄌𑄬𑄝𑄢𑄴 𑄇𑄮𑄠𑄬𑄘𑄬 𑄇𑄪𑄚𑄴𑄚𑄪𑄠 𑄃𑄊𑄬𑄘𑄬𑅁 𑄢𑄧-𑄟𑄧𑄚𑄬𑄇𑄴𑄇𑄳𑄡𑄧 𑄞𑄝𑄬𑄖𑄴𑄬 𑄥𑄬 𑄇𑄪𑄚𑄴𑄪𑄠𑄖𑄴 𑄇𑄨 𑄃𑄉𑄬 𑄌𑄁𑄉𑄮𑄄𑅁

𑄥𑄬 𑄇𑄪𑄚𑄴𑄪𑄠𑄖𑄴 𑄌𑄬𑄝𑄖𑄴𑄖𑄳𑄡𑄄 𑄉𑄬𑄣𑄧𑅁 𑄥𑄨𑄚𑄴𑄘𑄩 𑄇𑄪𑄚𑄴𑄪𑄠𑄖𑄴 𑄟𑄣𑄧𑄚𑄩 𑄥𑄪𑄚𑄴𑄘𑄧𑄢𑄩 𑄘𑄮𑄇𑄚𑄚𑄴 𑄃𑄉𑄬𑅁 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄘𑄬𑄊𑄬𑄖𑄴𑄬, 𑄟𑄣𑄧𑄚𑄩 𑄥𑄪𑄚𑄴𑄘𑄧𑄢𑄩 𑄘𑄮𑄉𑄚𑄧𑄖𑄴 𑄢𑄋 𑄢𑄋 𑄉𑄮𑄢𑄨, 𑄏𑄧𑄣𑄧𑄁 𑄏𑄧𑄣𑄧𑄁 𑄛𑄚𑄨 𑄇𑄪𑄖𑄴𑄨 𑄛𑄚𑄨𑄣𑄮𑄄 𑄞𑄧𑄢𑄨 𑄗𑄮𑄄𑄠𑄳𑄡𑄬𑅁 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄝𑄎𑄢𑄚𑄴 𑄊𑄪𑄢𑄨 𑄝𑄬𑄢𑄬𑄚𑄳𑄡𑄠𑄴 𑄦𑄧𑄢𑄚𑄴 𑄃𑄧𑄄𑄚𑄳𑄡𑄄 𑄛𑄚𑄨𑄖𑄌𑄴 𑄉𑄧𑄢𑄬𑄢𑄴𑅁 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄥𑄬 𑄇𑄪𑄖𑄴𑄨𑄝𑄪𑄖𑄴𑄪𑄚𑄴 𑄘𑄮𑄉𑄚𑄧𑄖𑄴 𑄥𑄮𑄟𑄬𑄚𑄳𑄡𑄄 𑄛𑄚𑄨 𑄈𑄬𑄣𑄧𑅁 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄛𑄚𑄨𑄠𑄚𑄴 𑄈𑄬𑄄𑄚𑄳𑄡𑄄 𑄛𑄙 𑄍𑄉𑄧𑄣𑄴 𑄃𑄧𑄄𑄠𑄳𑄡𑄬𑅁 𑄟𑄧𑄣𑄧𑄚𑄩 𑄥𑄪𑄚𑄴𑄘𑄧𑄢𑄩 𑄍𑄧𑄉𑄧𑄣𑄴𑄪𑄠𑄢𑄬 𑄘𑄮𑄉𑄚𑄧𑄖𑄴 𑄝𑄚𑄨 𑄗𑄮𑄄𑄠𑄳𑄡𑄬𑅁 𑄢-𑄟𑄚𑄬𑄇𑄴𑄇𑄳𑄡𑄧 𑄝𑄎𑄢𑄧𑄖𑄴𑄪𑄚𑄴 𑄚𑄧 𑄜𑄨𑄢𑄬𑄢𑄴 𑄘𑄬𑄢𑄨 𑄃𑄧𑄢𑄴 𑄃 𑄚𑄧 𑄆𑄡𑄬𑄢𑄴𑅁 𑄖𑄬 𑄌𑄧𑄄 𑄥𑄮𑄚 𑄃𑄉𑄧𑄢 𑄥𑄇𑄴𑄨𑄉𑄪𑄚𑄧𑄢𑄬 𑄟𑄧𑄚𑄧𑄖𑄴 𑄖𑄪𑄣𑄬𑄢𑄴𑅁

𑄇𑄧𑄖𑄴𑄬

𑄉𑄎𑄧 𑄟𑄧𑄙𑄳𑄡𑄬 𑄥𑄨𑄝𑄁 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄝𑄎𑄧 𑄟𑄧𑄙𑄳𑄡𑄬 𑄆𑄉𑄪𑄡𑄳𑄡 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄣𑄪𑄘𑄨 𑄟𑄧𑄙𑄳𑄡𑄬 𑄊𑄨𑄣 𑄢𑄎, 𑄥𑄇𑄴𑄇𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄛𑄧𑄇𑄴𑄨 𑄟𑄧𑄙𑄳𑄡𑄬 𑄞𑄨𑄢𑄬𑄎𑄴 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄛𑄧𑄥𑄪 𑄟𑄧𑄙𑄳𑄡𑄬 𑄥𑄨𑄁𑄦𑄧 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄟𑄎𑄧 𑄟𑄧𑄙𑄳𑄡𑄬 𑄄𑄎 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄛𑄚𑄨 𑄟𑄧𑄙𑄳𑄡𑄬 𑄉𑄮𑄋𑄩 𑄢𑄎, 𑄥𑄇𑄴𑄩 𑄃𑄧𑄄𑄠𑄳𑄡𑄧 𑄖𑄪𑄟𑄨𑅁

𑄃𑄟 𑄇𑄪𑄟𑄢𑄬 𑄆𑄘𑄧𑄇𑄴𑄈𑄧𑄚𑄴 𑄇𑄨 𑄉𑄧𑄢𑄬𑄢𑄴 𑄇𑄮𑄄𑄘𑄧 𑄚𑄧-𑄛𑄢𑄨𑅁

𑄌𑄧𑄄 𑄥𑄮𑄚 𑄥𑄇𑄴𑄨𑄉𑄪𑄚𑄧𑄢𑄬 𑄟𑄧𑄚𑄧𑄖𑄴 𑄖𑄪𑄣𑄨𑄚𑄳𑄡𑄄 𑄄𑄚𑄴𑄘𑄨 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄟𑄣𑄧𑄚𑄩 𑄥𑄪𑄚𑄴𑄘𑄧𑄢𑄩 𑄘𑄮𑄉𑄚𑄴-𑄃𑄧 𑄞𑄨𑄘𑄨𑄢𑄬 𑄍𑄉𑄧𑄣𑄴 𑄝𑄚𑄬𑄭 𑄖𑄮𑅆𑄚𑄳𑄡𑄄 𑄝𑄚𑄳𑄡 𑄃𑄊𑄬-𑄘𑄬 𑄄𑄙𑄪 𑄞𑄬 𑄞𑄬 𑄢𑄧 𑄉𑄮𑄢𑄨 𑄍𑄉𑄧𑄣 𑄘𑄧𑄉𑄧𑄢𑄬𑄢𑄴 𑅁 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄍𑄉𑄧𑄣𑄴 𑄘𑄧𑄉𑄧𑄢𑄚 𑄢-𑄝𑄪𑄠 𑄥𑄪𑄚𑄨𑄚𑄳𑄡𑄄 𑄌𑄧𑄄 𑄥𑄮𑄚 𑄢𑄧 𑄉𑄮𑄢𑄨 𑄉𑄮𑄢𑄨 𑄇𑄧𑄖𑄴𑄬, 𑄟𑄣𑄧𑄚𑄩 𑄥𑄪𑄚𑄴𑄘𑄧𑄢𑄩 𑄢𑄧-𑄟𑄧𑄚𑄬𑄇𑄴𑄇𑄳𑄡𑄧𑄢𑄬 𑄛𑄙 𑄍𑄉𑄧𑄣𑄴 𑄝𑄚𑄬𑄭 𑄗𑄮𑄄𑄠𑄳𑄡𑄬 𑅁” 𑄌𑄧𑄭 𑄥𑄮𑄚 𑄃𑄢𑄧 𑄇𑄧𑄖𑄴𑄬 “𑄢𑄧-𑄟𑄚𑄬𑄇𑄴𑄇𑄳𑄡𑄧𑄢𑄬 𑄇𑄬𑄠𑄚𑄳𑄡 𑄉𑄧𑄢𑄨 𑄛𑄙 𑄍𑄉𑄧𑄣𑄧𑄖𑄴𑄪𑄚𑄴 𑄅𑄘𑄴𑄙𑄢𑄴 𑄉𑄧𑄢 𑄡𑄠𑄴 𑅃”

𑄌𑄧𑄄 𑄥𑄮𑄚 𑄝𑄪𑄘𑄴𑄙𑄨 𑄚𑄨𑄉𑄨𑄣𑄬𑄚𑄳𑄡𑄄 𑄆𑄇𑄴𑄇𑄚𑄴 𑄇𑄟𑄴 𑄉𑄧𑄣𑄴𑄧 𑅁 𑄢𑄧-𑄟𑄚𑄬𑄇𑄴𑄇𑄳𑄡𑄢𑄴 𑄙𑄫𑄘𑄨, 𑄥𑄪𑄣𑄪𑄟𑄴 𑄌𑄧𑄄 𑄥𑄮𑄚 𑄥𑄨𑄠𑄚𑄨 𑄛𑄨𑄚𑄨𑄣𑄧 𑅁𑄖 𑄟𑄙 𑄌𑄪𑄣𑄚𑄴 𑄟𑄧𑄘𑄴𑄧 𑄙𑄧𑄇𑄴 𑄉𑄮𑄢𑄨𑄚𑄳𑄡𑄄 𑄈𑄧𑄝𑄧𑄁 𑄝𑄚𑄨𑄚𑄳𑄡𑄄 𑄣𑄪𑄉𑄬𑄣𑄧 𑅁 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄇𑄝𑄧𑄢𑄚𑄨 𑄛𑄨𑄚𑄨𑄚𑄳𑄡𑄄 𑄟𑄧𑄢𑄧𑄖𑄴 𑄥𑄎𑄨𑄣𑄧 𑅁 𑄖𑄬 𑄝𑄎𑄢𑄴 𑄛𑄧𑄘𑄧𑄖𑄴 𑄝𑄮𑄄 𑄢𑄮𑄄𑄠𑄬 𑅁𑄘𑄮𑄣𑄴 𑄄𑄇𑄴𑄪𑄠 𑄢𑄎𑄴𑄛𑄪𑄖𑄳𑄢𑄧 𑄌𑄬𑄋𑄬𑄢 𑄃𑄧𑄣𑄧 𑅁 𑄝𑄎𑄢𑄧 𑄟𑄚𑄪𑄌𑄴𑄍𑄪𑄚𑄬 𑄡𑄘𑄬 𑄌𑄬𑅆 𑄌𑄬𑅆 𑄡𑄚𑄴 𑅁 𑄞𑄝𑄧𑄚𑄴 𑄆𑄄 𑄘𑄮𑄣𑄴 𑄟𑄚𑄪𑄌𑄴𑄍𑄪𑄠 𑄇𑄧𑄚𑄴𑄚 𑄇𑄪𑄖𑄴𑄪𑄚𑄴 𑅃 𑄝𑄎𑄢𑄧 𑄟𑄚𑄪𑄌𑄴𑄍𑄪𑄚𑄬 𑄇𑄧𑄣𑄇𑄴, “𑄖𑄪𑅆 𑄇𑄧-𑄚𑄧 𑄎𑄟𑄬𑅆 𑄅𑄘𑄨𑄝𑄬𑄚𑄨𑅃 𑄃𑄟 𑄃𑄘𑄟𑄧𑄖𑄴 𑄆𑄇𑄴𑄎𑄧𑄚𑄴 𑄃𑄉𑄬𑄘𑄬 𑄖𑄬 𑄎𑄟𑄬𑅆 𑄖𑄪𑄣𑄨𑄝𑄧 𑅁 𑄃𑄟 𑄥𑄧𑄟𑄢𑄬 𑄡𑄬𑄝𑄬𑄚𑄨𑅃” 𑄌𑄧𑄄 𑄥𑄮𑄚 𑄇𑄧𑄣𑄧𑄘𑄬, “𑄘𑄨𑄎𑄳𑄡𑄟𑄠𑄬𑄇𑄴𑄇𑄳𑄡 𑄃𑄧𑄣𑄬 𑄎𑄟𑄬𑅆 𑄅𑄘𑄨𑄟𑄴 𑅁 𑄃 𑄎𑄟𑄬𑅆 𑄅𑄘 𑄃𑄧𑄣𑄬 𑄖𑄮𑄟 𑄥𑄧𑄟𑄢𑄬 𑄡𑄬𑄟𑄴 𑅁

𑄖𑄬 𑄝𑄎𑄢𑄧𑄖𑄴𑄪𑄚𑄴 𑄜𑄨𑄢𑄨 𑄡𑄘𑄧𑄚𑄴𑄬 𑄟𑄚𑄪𑄌𑄴𑄍𑄪𑄚𑄧 𑄥𑄧𑄟𑄢𑄬 𑄉𑄬𑄣𑄧 𑅁 𑄡𑄬 𑄉𑄨𑄢𑄮𑄌𑄴𑄍𑄪𑄠 𑄎𑄟𑄬𑅆 𑄖𑄪𑄣𑄨𑄝𑄧 𑄇𑄮𑄄𑄠𑄳𑄡𑄬 𑄥𑄬 𑄊𑄧𑄢𑄚𑄧𑄖𑄴 𑄌𑄧𑄄 𑄥𑄮𑄚𑄢𑄬 𑄖𑄪𑄣𑄩 𑄘𑄨𑄣𑄇𑄴𑄮𑄄 𑅁 𑄉𑄨𑄢𑄮𑄌𑄴𑄍𑄪𑄠𑄢𑄬 𑄇𑄧𑄣𑄇𑄴𑄬, “𑄆𑄄𑄠𑄳𑄡 𑄄𑄝 𑄎𑄟𑄬𑅆 𑄅𑄘𑄨𑄝𑄧 𑄇𑄮𑄄𑄠𑄳𑄡𑄬 𑅁 𑄖𑄢𑄬 𑄖𑄮𑄟𑄄𑄙𑄪 𑄃𑄚𑄨 𑄘𑄨𑄠𑄬𑅆 𑅁” 𑄎𑄟𑄬𑅆 𑄖𑄪𑄣𑄩𑄝𑄧𑄘𑄬 𑄉𑄨𑄢𑄮𑄌𑄴𑄍𑄪𑄠 𑄖 𑄏𑄨-𑄝𑄪𑄠𑄢𑄬 𑄌𑄧𑄄 𑄥𑄮𑄚𑄣𑄮𑄄 𑄟𑄬𑄣 𑄉𑄮𑄢𑄨 𑄘𑄨𑄣𑄧 𑅁 𑄖𑄬 𑄢𑄬𑄖𑄴 𑄃𑄧𑄣𑄧 𑅁 𑄢𑄬𑄖𑄴 𑄃𑄧𑄣𑄬 𑄊𑄪𑄟𑄴 𑄡𑄬𑄝𑄇𑄴 𑅁 𑄚𑄪𑄠 𑄝𑄮-𑄎𑄟𑄬𑅆 𑄉𑄪𑄘𑄨𑄖𑄴 𑄈𑄘𑄧 𑄅𑄉𑄪𑄢𑄬 𑄊𑄪𑄟𑄴 𑄡𑄬𑄝𑄖𑄴𑄖𑄳𑄡𑄄 𑄥𑄮𑄟𑄬𑄣𑄇𑄴𑄮𑄄 𑅁 𑄈𑄘𑄧 𑄅𑄉𑄪𑄢𑄬 𑄝𑄮-𑄎𑄟𑄬𑅆 𑄊𑄪𑄟𑄧𑄖𑄴 𑄛𑄧𑄣𑄴𑄣𑄇𑄴 𑅁

𑄖𑄬 𑄊𑄪𑄟𑄧𑄖𑄴 𑄛𑄧𑄖𑄴𑄬 𑄚𑄪𑄠 𑄎𑄟𑄬𑅆𑄝𑄪𑄠 𑄟𑄧𑄢𑄬 𑄇𑄮𑄄 𑄘𑄨𑄠𑄳𑄡𑄬 𑄄𑄚𑄴𑄘𑄨 𑄊𑄪𑄟𑄧𑄖𑄴 𑄛𑄧𑄣𑄴𑄬 𑄊 𑄃𑄧𑄝𑄧, 𑄚𑄧 𑄛𑄧𑄢𑄨𑄌𑄴 𑄇𑄧𑄠𑄴 𑅁 𑄃 𑄅𑄚𑄴𑄘𑄨 𑄊𑄪𑄟𑄧𑄖𑄴 𑄛𑄧𑄣𑄴𑄬 𑄇𑄝 𑄡𑄬𑄝𑄬, 𑄅𑄚𑄴𑄘𑄨 𑄚𑄧 𑄛𑄧𑄢𑄨𑄌𑄴 𑄇𑄧𑄠𑄴 𑅁 𑄇𑄇𑄴𑄬 𑄈𑄘𑄧𑄖𑄴 𑄇𑄇𑄴𑄬 𑄟𑄘𑄨𑄖𑄴 𑄅𑄘𑄬 𑄣𑄟𑄬 𑅁 𑄃𑄢𑄴 𑄟𑄪𑅆 𑄟𑄘𑄨𑄖𑄴 𑄣𑄟𑄨𑄣𑄬 𑄖𑄬 𑄈𑄘𑄧𑄖𑄴 𑄅𑄘𑄬 𑅁 𑄖 𑄙𑄉𑄬𑄚𑄴𑄘𑄨 𑄟𑄪𑅆 𑄛𑄧𑄢𑄨𑄣𑄬 𑄇𑄮𑄄 𑄘𑄬 𑄄𑄚𑄴𑄘𑄨 𑄚𑄧 𑄆𑄌𑄴, 𑄊 𑄃𑄧𑄝𑄧 𑄇𑄧𑄠𑄴 𑅁 𑄃𑄢𑄴 𑄅𑄚𑄴𑄘𑄨 𑄛𑄧𑄢𑄨𑄣𑄬 𑄄𑄚𑄴𑄘𑄨 𑄚𑄧 𑄆𑄌𑄴, 𑄇𑄝 𑄡𑄬𑄝𑄬 𑄇𑄧𑄠𑄴 𑅁 𑄄𑄝 𑄇𑄨𑄚𑄴𑄘𑄨𑄇𑄴𑄬 𑄛𑄉𑄧𑄣𑄴 𑄎𑄟𑄬𑅆 𑄖𑄪𑄣𑄴𑄬𑄄 𑅁 𑄛𑄧𑄦𑄴𑄢𑄴 𑄃𑄧𑄄𑄚𑄳𑄡𑄄 𑄖𑄢 𑄏𑄨𑄝𑄪𑄠 𑄆𑄄 𑄇𑄧𑄙𑄚𑄨 𑄖𑄟𑄢𑄬 𑄇𑄧𑄣𑄧 𑅁

𑄖𑄬 𑄖𑄟𑄴𑄟 𑄚𑄪𑄠 𑄎𑄟𑄬𑅆𑄝𑄪𑄠𑄢𑄬 𑄓𑄉𑄨𑄣𑄧 𑅁 𑄝𑄨𑄣𑄬 𑄎𑄟𑄬𑅆 𑄝𑄝 𑄆𑄇𑄴𑄬𑄚 𑄄𑄙𑄪 𑄆𑄡𑄧 𑅁 𑄎𑄟𑄬𑅆𑄝𑄪𑄠 𑄖 𑄥𑄪𑄢𑄨𑄝𑄪𑄠 𑄄𑄙𑄪 𑄉𑄬𑄣𑄧 𑅁 𑄖 𑄥𑄪𑄢𑄨𑄝𑄪𑄠 𑄖𑄢𑄬 𑄇𑄧𑄣𑄧𑄘𑄬, “𑄝𑄝 𑄃 𑄝𑄬𑄣𑄬 𑄏𑄨 𑄝𑄪𑄠𑄢𑄬 𑄇𑄧𑄘𑄬 𑅁 𑄄𑄚𑄴𑄘𑄨 𑄚𑄧 𑄆𑄌𑄴 𑄇𑄝 𑄡𑄬𑄝𑄬, 𑄅𑄚𑄴𑄘𑄨 𑄚𑄧 𑄆𑄌𑄴 𑄊 𑄃𑄧𑄝𑄧 𑅁 𑄏𑄨-𑄝𑄪𑄠 𑄖𑄮𑄟 𑄥𑄧𑄟𑄢𑄬 𑄊𑄪𑄟𑄧𑄖𑄴 𑄛𑄧𑄢𑄨𑄣𑄬 𑄚𑄇𑄨 𑄇𑄇𑄴𑄬 𑄈𑄘𑄧𑄖𑄴, 𑄇𑄇𑄴𑄬 𑄟𑄘𑄨𑄖𑄴 𑄛𑄧𑄢𑄧𑄘𑄬𑅃” 𑄎𑄟𑄬𑅆𑄝𑄪𑄠 𑄖 𑄥𑄪𑄢𑄨𑄝𑄪𑄠𑄢𑄬 𑄅𑄖𑄴𑄧𑄢 𑄘𑄨𑄣𑄧𑄘𑄬, “𑄟𑄧𑄢𑄴 𑄟𑄣𑄨𑄚𑄩 𑄥𑄪𑄚𑄴𑄘𑄧𑄢𑄩𑄖𑄴𑄪𑄚𑄴 𑄛𑄙 𑄍𑄉𑄧𑄣𑄴 𑄟𑄚𑄴𑄬 𑄃𑄊𑄬𑄘𑄬 𑅁”

𑄚𑄫𑄠 𑄎𑄟𑄬𑅆𑄝𑄪𑄠 𑄟𑄚𑄳𑄡 𑄇𑄧𑄙𑄉𑄚𑄴 𑄖 𑄥𑄪𑄢𑄨𑄝𑄪𑄠 𑄈𑄝𑄧𑄢𑄴 𑄛𑄬𑄚𑄬𑅆 𑄥𑄪𑄢𑄨𑄝𑄪𑄘𑄉𑄨 𑄚𑄬𑄇𑄴 𑄟𑄮𑄉𑄬 𑄥𑄧𑄣𑄴𑄣 𑄉𑄧𑄣𑄴𑄣𑄇𑄴 𑄛𑄙 𑄍𑄉𑄧𑄣𑄴𑄪𑄠 𑄇𑄨𑄚𑄨 𑄘𑄨𑄝𑄖𑄴𑄖𑄳𑄡𑄄 𑅁 𑄎𑄟𑄬𑅆𑄝𑄪𑄠𑄢𑄬 𑄛𑄙 𑄍𑄉𑄧𑄣𑄴 𑄇𑄨𑄚𑄨𑄝𑄖𑄳𑄡𑄄 𑄑𑄬𑄋 𑄘𑄨𑄣𑄇𑄴 𑅁 𑄚𑄫𑄠 𑄎𑄟𑄬𑅆𑄝𑄪𑄠 𑄑𑄬𑄋 𑄛𑄬𑅆𑄚𑄳𑄡𑄄 𑄟𑄣𑄧𑄚𑄩 𑄥𑄪𑄚𑄴𑄘𑄧𑄢𑄩 𑄘𑄮𑄉𑄚𑄧𑄖𑄴 𑄉𑄬𑄣𑄧 𑅁 𑄛𑄙 𑄍𑄉𑄧𑄣𑄴𑄪𑄠 𑄘𑄧𑄢𑄴𑄘𑄟𑄴 𑄉𑄮𑄢𑄨𑄚𑄳𑄡𑄄 𑄟𑄣𑄧𑄚𑄩 𑄥𑄪𑄚𑄴𑄘𑄧𑄢𑄩𑄖𑄴𑄪𑄚𑄴 𑄇𑄨𑄚𑄨-𑄣𑄧 𑅁 𑄟𑄣𑄧𑄚𑄩 𑄥𑄪𑄚𑄴𑄘𑄢𑄩 𑄘𑄮𑄉𑄚𑄧𑄖𑄴 𑄆𑄇𑄴𑄊𑄧𑄢𑄴 𑄮𑄢𑄨𑄚𑄳𑄡𑄄 𑄟𑄣𑄧𑄚𑄩 𑄥𑄪𑄚𑄴𑄘𑄧𑄢𑄩𑄖𑄴𑄪𑄚𑄴 𑄇𑄨𑄚𑄨-𑄣𑄧 𑅁 𑄟𑄣𑄧𑄚𑄩 𑄥𑄪𑄚𑄴𑄘𑄢𑄩 𑄘𑄮𑄉𑄚𑄧𑄖𑄴 𑄆𑄇𑄴𑄊𑄧𑄢𑄴 𑄍𑄉𑄧𑄣𑄴 𑄝𑄚𑄨 𑄖𑄮𑄄𑄠𑄬 𑅁 𑄃 𑄍𑄉𑄧𑄣𑄪𑄚𑄴 𑄉𑄧𑄘𑄴𑄧𑄚𑄖𑄴 𑄇𑄎𑄨 𑄝𑄚𑄳𑄡 𑅁𑄝𑄬𑄇𑄴 𑄍𑄉𑄧𑄣𑄴 𑄉𑄧𑄘𑄴𑄧𑄚𑄖𑄴𑄪𑄚𑄴 𑄇𑄎𑄨𑄠𑄚𑄨 𑄝𑄪𑄘𑄪𑄌𑄴 𑄝𑄪𑄘𑄪𑄌𑄴 𑄉𑄮𑄢𑄨 𑄇𑄝𑄨 𑄘𑄨𑄣𑄧 𑅁 𑄝𑄬𑄇𑄴 𑄍𑄧𑄉𑄧𑄣𑄪𑄚𑄴 𑄟𑄚𑄪𑄥 𑄃𑄧𑄣𑄇𑄴 𑅁 𑄟𑄚𑄪𑄌𑄴𑄍𑄪𑄚𑄴 𑄟𑄣𑄧𑄚𑄩 𑄥𑄪𑄚𑄴𑄘𑄧𑄢𑄩 𑄘𑄮𑄉𑄚𑄧𑄖𑄴 𑄌𑄬𑄝𑄖𑄳𑄡𑄠𑄴 𑄆𑄇𑄴𑄏𑄇𑄴 𑄃𑄧𑄄𑄠𑄳𑄡𑄧𑄚𑄴 𑅁 𑄟𑄚𑄪𑄌𑄴𑄍𑄪𑄚𑄬 𑄄𑄠𑄚𑄴 𑄘𑄬𑄉𑄨𑄚𑄳𑄡𑄄 𑄃𑄟𑄧𑄇𑄴 𑄃𑄧𑄣𑄇𑄴 𑅁 𑄃 𑄇𑄪𑄎𑄨𑄠𑄳𑄡𑄧 𑄃𑄧𑄣𑄇𑄴 𑅁

𑄍𑄉𑄧𑄣𑄧𑄖𑄴𑄪𑄚𑄴 𑄟𑄚𑄪𑄎𑄴 𑄃𑄧𑄄𑄠𑄳𑄡𑄧𑄚𑄴𑄘𑄬 𑄄𑄉𑄪𑄚𑄬 𑄟𑄪𑄇𑄴𑄖𑄨 𑄛𑄬𑅆𑄚𑄳𑄡𑄄 𑄡 𑄊𑄧𑄢𑄧𑄖𑄴 𑄖𑄬 𑄉𑄬𑄣𑄇𑄴 𑄌𑄧𑄄 𑄥𑄮𑄚𑄠𑄳𑄡𑄧 𑄖𑄬 𑄡𑄬 𑄊𑄧𑄢𑄧𑄖𑄴 𑄎𑄟𑄬𑅆 𑄅𑄖𑄴𑄬 𑄥𑄬 𑄊𑄧𑄢𑄚𑄧𑄖𑄴 𑄢𑄧-𑄟𑄚𑄬𑄇𑄴𑄇𑄳𑄡𑄧𑄢𑄬 𑄣𑄮𑄄𑄚𑄳𑄡𑄄 𑄥𑄨𑄘𑄪 𑄉𑄬𑄣𑄧 𑅁 𑄥𑄨𑄘𑄪 𑄡𑄬𑅆𑄚𑄳𑄡𑄄 𑄖 𑄥𑄮𑄢𑄴 𑄥𑄮𑄢𑄨 𑄄𑄙𑄪 𑄥𑄣𑄟𑄴 𑄉𑄮𑄢𑄨 𑄛𑄧𑄣𑄴𑄧 𑅁 𑄇𑄧𑄣𑄧𑄘𑄬, “ 𑄟𑄪𑅆 𑄟𑄧𑄢𑄧𑄖𑄴 𑄚𑄧𑄠𑄴, 𑄟𑄨𑄣 𑅁 𑄝𑄨𑄝𑄧𑄘𑄧𑄖𑄴 𑄛𑄧𑄢𑄨𑄚𑄳𑄡𑄄 𑄟𑄪𑅆 𑄟𑄧𑄘𑄴𑄧 𑄞𑄬𑄎𑄴 𑄙𑄧𑄎𑄳𑄎𑄧𑄁 𑅁 𑄖𑄬 𑄟𑄧𑄢𑄬 𑄝𑄎𑄢𑄧 𑄟𑄚𑄪𑄎𑄴𑄥𑄪𑄚𑄬 𑄎𑄟𑄬𑅆 𑄅𑄘𑄨𑄝𑄖𑄳𑄖𑄳𑄡𑄄 𑄇𑄮𑄄𑄠𑄳𑄡𑄧𑄚𑄴 𑅁 𑄖𑄬 𑄖𑄢 𑄥𑄧𑄟𑄢𑄬 𑄆𑄄𑄚𑄳𑄡𑄄 𑄟𑄪𑅆 𑄎𑄟𑄬𑄄 𑄅𑄖𑄳𑄖𑄳𑄡𑄧𑄁𑄉𑄨 𑅁 𑄟𑄪𑅆 𑄝𑄨𑄝𑄧𑄘𑄧𑄖𑄴 𑄛𑄌𑄴𑄌𑄳𑄡𑄧𑄁 𑄥𑄨𑄖𑄴𑄖𑄳𑄡𑄄 𑄟𑄪𑅆 𑄆𑄄 𑄝𑄪𑄘𑄴𑄙𑄨𑄠𑄚𑄴 𑄉𑄮𑄢𑄨 𑄛𑄬𑄠𑄳𑄡𑄧𑄁 𑅁 𑄟𑄪𑅆 𑄟𑄛𑄴 𑄌𑄁 𑄖𑄮𑄟 𑄘𑄨-𑄎𑄧𑄚𑄧𑄖𑄴𑄪𑄚𑄴 𑅁 𑄖𑄪𑄟𑄨 𑄄𑄌𑄴𑄌𑄖𑄴𑄪𑄚𑄴 𑄙𑄧𑄢𑄨 𑄟𑄧 𑄙𑄧𑄢𑄧𑄟𑄧𑄖𑄴𑄧 𑄟-𑄝𑄝𑄴 𑅁”

𑄌𑄧𑄄 𑄥𑄮𑄚𑄣𑄮𑄄 𑄢𑄧-𑄟𑄚𑄬𑄇𑄴𑄇𑄳𑄡𑄧 𑄖𑄧𑄢𑄧 𑄥𑄨𑄙𑄪 𑄢𑄧𑄣𑄇𑄴 𑅁 𑄟𑄨𑄣𑄧𑄚𑄴 𑄃𑄧𑄣𑄧, 𑄥𑄪𑄉𑄬 𑄥𑄚𑄴𑄖𑄨𑄠𑄬 𑄈𑄬𑄣𑄇𑄴 𑅁

𑄛𑄧𑄎𑄴𑄧𑄚𑄴 𑄃𑄧𑄄𑄠𑄳𑄡𑄬 𑄗𑄪𑄟𑄴, 𑄟𑄧𑄖𑄴𑄪𑄚𑄴 𑄆𑄡𑄬𑄢𑄴 𑄊𑄪𑄟𑄴

লেখক পরিচিতিঃ জ্যোতি প্রভা লারমা, এম এন লারমার বড় বোন ।

পজ্জন সংগ্রহ বইয়ের নাম “চাঙমা পজ্জন’র ফুলবারেং” ।।