চাকমা কবিতা "মনোবী" - বিক্রম চাকমা ।। chakma poetry Monobi - Bikram chakma

𑄟𑄮𑄚𑄮𑄝𑄩

𑄝𑄨𑄇𑄳𑄢𑄧𑄟𑄴 𑄌𑄋𑄴𑄟

𑄟𑄮𑄚𑄮𑄝𑄩, 𑄆𑄄 𑄟𑄪𑄢𑄮𑄣𑄳𑄡𑄬 𑄇𑄧𑄙 𑄇𑄨 𑄞𑄝𑄧𑄢𑄴𑅃

𑄖𑄪𑄄 𑄦𑄘𑄧𑄢𑄴 𑄇𑄧𑄚𑄴 𑄥𑄪𑄘𑄮𑄟𑄧𑄢𑄴 𑄙𑄧𑄉𑄬𑅃

𑄥𑄪𑄉𑄧 𑄥𑄧𑄝𑄧𑄚𑄴 𑄖𑄪𑄄 𑄇𑄨 𑄌𑄮𑄉𑄬 𑄚’𑄘𑄬𑄊𑄧𑄢𑄴𑅃

𑄟𑄨𑄏𑄨 𑄘𑄧’ 𑄡𑄧𑄢𑄴 𑄝𑄬𑄎𑄘𑄧𑄢𑄴 𑄜𑄏𑄢𑄴 𑄣𑄉𑄬𑅁

𑄎𑄖𑄴 𑄞𑄬𑄄𑄠𑄮𑄢𑄴 𑄟𑄚 𑄖𑄪𑄄 𑄚𑄧’𑄥𑄪𑄚𑄄𑄢𑄴,

𑄝𑄬𑄎𑄘𑄬 𑄢𑄨𑄚𑄨 𑄌𑄚𑄴 𑄖𑄧𑄢𑄬 𑄝𑄧𑄎𑄧𑄁 𑄌𑄮𑄉𑄬,

𑄖𑄢 𑄘𑄧’ 𑄖𑄧𑄢𑄬 𑄈𑄬𑄝𑄇𑄴 𑄘𑄨-𑄃𑄋𑄪𑄣𑄳𑄡𑄬 𑄚𑄧𑄉𑄬𑅁

𑄟𑄮𑄚𑄮𑄝𑄩 𑄄𑄠𑄚𑄨 𑄇𑄩 𑄖𑄪𑄄 𑄉𑄧𑄟𑄬 𑄝𑄪𑄏𑄮𑄢𑄴𑅃

𑄥𑄪𑄚𑄴 𑄟𑄮𑄚𑄮𑄝𑄩 𑄖𑄧𑄢𑄴 𑄜𑄏 𑄚𑄧’𑄝𑄪𑄘𑄪𑄣𑄨𑄣𑄬-

𑄆𑄇𑄴 𑄘𑄨𑄚𑄴 𑄣𑄪𑄇𑄴 𑄘𑄨 𑄡𑄬𑄝𑄧 𑄖𑄧𑄦𑄴 𑄚𑄧𑄋𑄚𑄴,

𑄞𑄬𑄄𑄠𑄮𑄢𑄴 𑄇𑄧𑄙𑄢𑄴 𑄙𑄧𑄉𑄬 𑄚𑄧’ 𑄦𑄘𑄨𑄣𑄬-

𑄘𑄪𑄉𑄬 𑄇𑄘𑄨 𑄡𑄬𑄝𑄧’ 𑄖𑄧𑄦𑄴 𑄎𑄨𑄁𑄇𑄚𑄨𑄠𑄚𑄴𑅁

𑄟𑄧𑄚𑄧𑄖𑄴 𑄢𑄉𑄬𑄌𑄴, 𑄖𑄪𑄤𑄴 𑄖𑄪𑄄 𑄚𑄧𑄥𑄪𑄚𑄨𑄣𑄬-

𑄥𑄬𑄎𑄬 𑄝𑄧𑄌𑄴 𑄉𑄧𑄢𑄨 𑄘𑄨𑄝𑄇𑄴 𑄖𑄧’ 𑄛𑄧𑄢𑄚𑄚𑄴𑅁