চাকমা গল্প "আবেদি কোচপানা" ইনজেব চাকমা // ChakmaStory - Injeb Chakma

আবেদি কোচপানা

ইনজেব চাকমা

অলংকরণঃ তুফান চাকমা

এক:
পোতপোত্যা জুন’ পহ্’র। এযেত্তে কেল্যা জুনান গাভুর পুন্নিমা অভ’। জুন’ পহ্’রে আগাঝ’ তারাউন কম চোঘত পরন। মাদিত্তুন সুচ পেদে লোই পারে। এধক্যে জুন’ পহ্’র তিরোজে এয’ লাগত ন’ পায়। মনে মনে ভাবের আগাঝত মেক ন’ থেলে জুনানর তেজ ভারি যায়। এ জুন’ পহ্’রান তারে ভাবনা সাগরত ধুবায় আ তুলে, তুলে আ ধুবায়। তে ভাবে আমা জুম্মউনর জিংকানিও এধক্যে অদ’ কত্তাম সাংসাঙ্যে লাগিলুন ………………। এ অক্তত জুম্মবি পিজোত্তুন বেত্তো বুন্যা চোল ঝারনি বেরাত গরি কয়েক্কো বিনি মুক্যে উচ্যা আনিল। কল’, আ দা কি অল’ নেনা আয়ে মংচ্ছা গরি আঘং। মক্যেউন মুঝুঙ দিনেই কল’, এইয়ে দা, মক্যে খেই চা। তোমা সিধু এধক্যে মক্যে খেই ন’ পায়। বিনি মক্যে। মামা জুমত যেনেই ভাঙি আন্যে। তুই এবে শুনিনেই।
সক্যেয়্য তিরোজর চেদন ন’ ফিরে। ইজোর মাধাত সাঙু দুয়োরত পিজুম বাচ্ছো বান্যা বাচ্ছুত হেলান দি আগাঝ’ কিথ্যা চেই কি যে ভাবের। এ সেরেদি জুম্মবি পানি কুত্তি আ আহ্’ত ধোবার লদাবো আনি দি দাঙর র’ গরি কল, দাদা, ও দাদা আ কি অয়ে নেনা? সক্যে তিরোজর চেদন এল’। আদিক্যা গরি উগুরি উদি কল, কি কত্তে? মক্যে খেদে। মামা ত’ নাঙে জুমত্তুন বিনি মক্যে ভাঙি আনি দিয়্যা। মাত্তর, তিরোজে সে কধা শুনিলেও এধক আমন ন’ দ্যা। আহ্’ত ধোই এক্কো মক্যে আহ্’ত তালি লল’। এক কাম দিনেই কল, আ দ’ সুয়োত আঘে। আধা। এ অক্তত আগাঝত দাঙর এক্কো কালা মেক চাগা এই জুন’ পহ্’রানরে ধীমে ধীমে গরি দিয়্যা। মক্যে খেই খেই তিরোজে জুম্মবিরে কল, আমা জিংকানিয়ানও এ জুন’ পহ্’রান সান। জুম্মবি ভারি উচ গরি আঘে। তিরোজরে অনসুর আমল দি চায়। তার কিয়ে, ভাপ ভঙ্গি, কধা বাত্তা কি কয়।
সক্যে রেত সং ভাক। বেক অলর চেরো কিথ্যা। বানা তারা দ্বিজনে জাগি আঘন ইজোর’ মাধাত। কাদি মাচ। থাক্যে থাক্যে আগাঝত কালা মেক উদিল। এক্কো মেক চাগা পর আর এক্কো মেক চাগা জুনানরে ধাগি নেযার। জুয়ুত জুয়ুত বোইয়ের বার। জর এই পারে। জুন পহ্’রান নেই আর। কাজি জুন পহ্’রত্তুন ইক্যে কিচ্ছু দেঘা ন’ যার। এ জুত জুম্মবি ভাবে, তিরোজ’ করত পুরিবার। এধকন সং পোতপোত্যা জুন’ পহ্’রত সাহজে ন’ কুলায়। করত পুরিবার। লাজে। তিরোজ’ করত পুরি জুম্মবি কল, দাদা, মন’ আওচ পুরে পারিম না ন’ পারিম। এধক্যে গরি জনমান ত’ কায় থেই এ জিংকানি পার গরি।
তিরোজে অলর। কন’ র’ নেই। মক্যে বিজি এক্কা এক্কা গরি চাবায়। মনে মনে ভাবে মেয়্যাত বেচ পুরি যাঙর। তিরোজে এচ্যে জুম্মবিত্তুন বিদেয় লবার ইচ্যে। তে ঝারত সমেব’। জুম্মল্যাণ্ড বানেবার লাড়েয়ত তে সমার অদ’ চায়। মাত্তর! জুম্মবি তারে যে ধক্যে গরি নোনেই গরে, কিরব্যা গরের কেনে কব’ সে কধা। জুম্মবি কি তারে ঝারত সমেবার ইরি দিব? পরে জুম্মবি শিরেবোত আহ্’তআনদোই পজ্যে দি দি কল, এ জুনানরে স্বাক্খী রাঘে কঙর, এ জিংকানি কারলোই যুনি ঘর বানং সিবে অলদে তুই। তুই বাদে কাররে ন’ চাং, ন’ চেম। তারাতাঙুরি জুম্মবি আগাঝ কিথ্যা আঙুন দেঘে দিনেই কল, চা দা, আমারে দেঘিনেই জুনানে লাজে মু লুগেল’। সক্যে জুনি পুক্কুন তলে তলে উরদন। সে জুনি পুক্কুন দেঘেই দিনেই আর’ কল, দাদা, মুই বানা তরে চাং। এ জুনি পুক্কুন যেধক্যে গরি রেত্তো রাঘান, মুই গোদা জিংকানি সং ত’ ছাবা অই থেম। এক জনম নয়, জনম জনম তর অই জনম ওম। জুনানে তা ধক বুঝি পাচ্যে। মনে মনে ভাবে এ সলাবোত ম কধান কুবার জু অহ্’য়ে। এ অক্তত যা কং সিয়ান তে গজি লব’ ভাবিনে কল, চিজি, মুই এক্কান কধা কবার চাঙ কিচ্ছু মনে ন’ গরিবে নি? জুম্মবি কল- ক’ দাদা। নিচিদে মনে কোই পারচ। তরে যুনি কিচ্ছু মনে গরিদুং এ কিয়ে, মন কিচ্ছু গোজে ন’ দিদুং। তরে বিশ্চেচ যেনেই বেক গোজে দিলুং তরে। এ কিয়েনর নানু বানা তুই। তুই আহ্ত দুওচ বেক তর।
তিরোজে জুম্মবি মুয়ানত আহ্’ত্তান নাদে দিনেই কল, সেধক্যে গরি ন’ কোচ না চিজি। তুই দেঘর যক্যে আগাঝত মেক ন’ এল’ সক্যে জুন পহ্’রান ধুমুলক খেলার। পোত্যপোত্যা জুন পহ্’র। ইক্যে নেই আর। আগাঝত মেক উত্তে। থিক আমা জাদর ভাগ্যাঝত মেক উত্তে। আমা নাঙে বেল নেই আর। যা সুক শান্দি এল ব্রিটিশ আমলত। ব্রিটিশ লামি যানার পর পাকিস্তান আমলত্তুন ধুরি বেচ আমা অধিগানি কারি নেযাদে নেযাদে ইক্যে বাংলাদেচ আমালত পার্বত্য চুক্তি অলেও কিচ্ছুন নেই। সরগারে চুক্তি বাস্তবায়ন ন’ গরের। শান্তি বাহিনীউনে লাম্বা ২৫ বঝর সং লাড়েই গরি পার্বত্য চট্টগ্রাম চুক্তি গরিলাক। জাদত্যাই এক্কান সনদ ছিনি আনিলাক। এ চুক্তিবো বাস্তবায়ন গরিবার তর মর ইরুক পিড়িউন দায়িত্ব। এ চুক্তিবো বাস্তবায়ন ন’ অলে জুম্ম জাদর মাজারা ন’ থেব।
: দাদা, মুই দরাঙর। তারাতাঙুরি জুম্মবি কল।
: কিত্যা?
: তুই যুনি আহ্’জি যাচ!! তরে যুনি মারে ফেলান। [তার চিদে বিরোদি দলে যুনি মারে ফেলান। পার্বত্য চুক্তি অহ্’নার পর ইয়োত দিবে দল আঘন। তারা ধুরি নেযা নেযি, মারে ফেলা-ফেলি গরন।]
: দরেবার কি আঘে? মরা দ’ পরিব একদিন। বহ্’ নিঝেচ ইরি দিনেই তিরোজে কল। মরলেও ত’ আবেদি কোচপানা বুগোত নিনেই মুরিম। বাজিলে তর আবেদি কোচপান বুগত গরি বাজি।
: তুই যুনি ঝারত সমাচ ইক্যে মর কি অভ দাদা? মুই চাঙ তুই ঝারত যা। মাত্তর!
: মাত্তর কি? ক’ ভাঙি।
: দাদা, মু……ই কিয়ে অশিঝি। তিন দিল অল’ কাবর শুগেয়্যা। ইক্যে কি গরিম দাদা (বুকগোত আবুজি আজা গরি ধরিল জুম্মবি)। দাদা, ইয়ান মর দুচ। মুই তরে কোচপাং। সেনে ধর্য্য রাঘে ন’ পারং।
: চিজি, সে ধক্যে গরি ন’ কোচ। দুচ্ছান মর। মুই তরে আগে আগে কোই ন’ পারং, মুই ঝারত সমেম। যা অহ্’য়ে সিয়ান দ’ ইক্যে ফিরেবার নেই। মুই তরে কধা দিলুং, তুই ম’ মোক। নেগে মোগর যা অহ্’য়। দ্বি/তিন মাচ পরে জধন বানিবং। জুম্মবি শিরেবোত আহ্’তি দিনেই তিরোজে কল।
: দাদা, মরে দুরত ফেলে ন’ যেবে দ’। এক্কো বহ্ নিঝেচ ইরি দিল’।
: চিজি মুই তর বানা তর। তুই ইক্যে আমল গরি মুরোত পরি ভাবি চা, তর মর দ্বিজনর আবেদি কোচপানা ধন, যিবে এব’ এ মাদিত তে যুনি খুচ দিবার জাগা ন’ পায়, নিজ’ ভাচ, ওক্কোর থাকে পর ভাঝে লেঘা শিঘি পেই সালেন, এ বাজানা কি বাজি থানা কয়। আমা রিদিসুধোম, আল্যাক বেক আহ্’ঝি গেল সালেন, জাদর চিনপচ্যে কি দিবং!! যে জাদে সসাগজ্যা দেচ জয় গচ্ছে, যে জাদে মোঘলত্তুন যুদ্ধ গরি ফঁতে খাঁ-কালু খাঁ নাঙে দ্বিবে কামান ছিনি আন্যে, যে জাদে ব্রিটিশউনরে তিনতিনবার যুদ্ধত হোদে দিয়্যা, যে জাদে অন্যায় অবিঝের গায় সয়ে ন’ পারে বা দেচ শাসন গরি ইচ্চে সে জাদর লোই থেনে কিত্যাই আমি বানা জিংকানি সুঘর নাঙে, রংগতামাঝা নাঙে চাগুরি গরি গরি বোই থেবং। কধা আঘে, ফল গম ন’ অলে গাঝে গেইল খায়। এচ্যে আমা ফিরিবো যুনি পার্বত্য চট্টগ্রাম চুক্তিবো বাস্তবায়ন গরি ন’ পারি সালেন এ মাদিত খুচ দিবার এক ইঞ্চি জাগা ন’ থেব। জুম্মবি এধক্কন অলর গরি শুনি এল’। তেয়্য চায় দ্বিজনে আহ্’ত্যার ধুরিবার। মাত্তর, ইয়ান ভাবি আর’ পিতবাহোলি খায়, তা পেদত তারার দ্বিজনর আবেদি কোচপানা ধন জনম অভ’ সেনে মন মারে। মনে মনে ভারে কন’ দারু খেই ফেলব মাত্তর, সিয়ানও মুয়োত ন’ এযে। কিত্যা, ভালক বঝরর কোচপানা এ পুন্নিমা দিনত এগত্তর সে আবেদি কোচপানা ধন কেনে ফেলানা। তে ইয়ান ভাবি মনবল আনে তারার কোচপানা যুনি সত্যি অহ্’য় এ চিজিবোবে রাজনীতি জ্ঞানে জ্ঞানী গরি লারমা সান গরিবার। সেনে থিক গচ্ছে, তে আর অন্য চিদে ন’ গরি বানা বই পড়িব। ইয়ান ভাবি অন্য কধা ন’ কোই তিরোজ মুয়ো কিথ্যা চেই কল, দাদা, মুই চাং তুই দেঝত্যাই কাম গর। যা দা তুই। আমার জধন ওক বা না ওক তুই মরে তর মোক ইজেবে গজি লোয়চ ইয়ান মর স্বার্থক। ত’ আবেদি কোচপানা ধন মর পেদত ভিদিরে যক্যে আঘে ইবেরে চেইম আমার মহান নেতা লারমা সান গরি দাঙর দিঙর গরিবার। তত্তুন মর বানা এক্কান চানা, মরে তুই বই পাদে। জুম্মবি তা মামাত্তুন শুন্নে, গুর পেদত অক্তত বই পড়িলে গুরউন জ্ঞানি অহ্’ন সেনে তিরোজত্তুন বই চার।
তিরোজ মনান দাঙর অল। যুনিও মনত চিওম্যা থায় তবে বিশ্চেচ জুম্মবি খুজি মনে ইরি দিব। সে বিশ্চেসে লাম্বা ১ বঝর সং একাডেমি থুম গরি দের বঝর পর এচ্যে জুম্মবিলোই দেঘা। জুম্মবি কলেঝত পড়ানা অক্তত তারার কন’ এক অক্তত পার্বত্য চট্টগ্রাম চুক্তি বঝরি পালানা দেঘা। কধা কনা। সিত্তুন দুরি তারা দ্বিজন কোচপানা জনম। ইক্যে তারা কোচপানা ২ বঝর পর একসমারে রেত কাদানা। কধা কনা। এ আগে যা ফেসবুক ফোনে কধা। মাত্তর, জুম্মবি খবর ন’ পায় তে একাডেমিত যিয়ে। তিরোজে কন দিন ভাঙি ন’ কয়। সিয়েন যুনি মন দিলে গজি লোই ন’ পারে সে দরান তা মনত থায়।
এধক্যে কধা বাত্তায় রাত্তোল্যা ঝেল মারি উদিল। সক্যে তারা খবর পেলাক পোত্যা রাজি পরি এল। জুম্মবি কল, দাদা, বাবাদাঘি জাগিবাক। ঘচ্চে যারা যেবাক। জুম ইধু বাহ্ উদিবাক্কোই। ঘুম যেইগো। তরে চানাত বেচ্ছোন গরি দিদুং। বেচ্চোনত তিরোজে পরেল। গালত চুমি কল- থাক দাদা। রেত্তো আর লাম্বা অদ………….। সিয়ান কোই জুম্মবি উজেলঙ গদিত ঘুম যেবাত্যাই গেল।